37-ամյա տղամարդը նախկինում դատապարտված 43-ամյա բնակչի հետ վիճաբանել է եւ հրազենային վնասվածք հասցրել. նա ձերբակալվել է

2020թ  մայիսի 18-ին` ժամը 15:40-ին,  ձախ ծնկան հոդի շրջանի, սրունքի հրազենային վնասվածք, հեմոռոգիկ շոկ ախտորոշմամբ  «Աբովյան» բժշկական կենտրոն է դիմել նախկինում ծանր հանցագործությունների կատարման համար դատապարտված՝ Երեւան քաղաքի 43-ամյա բնակիչ, որը նույն օրը տեղափոխվել է «Միքայելյանի անվան» վիրաբուժության ինստիտուտ:

ՀՀ ՔԿ-ի լրատվության ծառայությունից հայտնում են, որ դեպքի առթիվ ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժնում ՀՀ քրեական օրենսգրքի  113-րդ հոդվածի (դիտավորությամբ առողջությանը միջին ծանրության վնաս պատճառելը) 2-րդ մասի 6-րդ կետով եւ 235-րդ հոդվածի (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 1-ին մասով հարուցվել է քրեական գործ: 43-ամյա տղամարդը տուժող է ճանաչվել:

Կատարված քննչական գործողությունների արդյունքում պարզվել է, որ 2020թ.  մայիսի 18-ին` ժամը 15:00-ի սահմաններում, Երեւան-Սեւան ավտոճանապարհի 14-րդ կմ  հատվածի  աջակողմյան հողապատ տարածքում 37-ամյա տղամարդը վիճաբանել է Երեւան քաղաքի 43-ամյա բնակչի հետ, որի ժամանակ մարմնական վնասվածք պատճառելու դիտավորությամբ, իր մոտ ապօրինի կերպով պահվող հրազենից կրակել է վերջինիս կենսական ոչ կարեւոր օրգանին՝ ոտքին, պատճառել մարմնական վնասվածք եւ դիմել փախուստի:

Նախաքննության ընթացքում կատարվել են մի շարք քննչական գործողություններ, այդ թվում՝ դեպքի վայրի զննություն, որի ժամանակ հայտնաբերվել են արնանման հետքեր, առգրավվել են հագուստներ, նշանակվել  համապատասխան փորձաքննություններ:

Իրականացած օպերատիվ-հետախուզական միջոցառումների արդյունքում՝ 37-ամյա տղամարդը ձերբակալվել է: