«Աշխատանքից հեռացրել եմ, լարվել են իմ դեմ ու սուտ մեղադրանքներ հնչեցրել». Աջափնյակ վարչական շրջանի նախկին ղեկավար

Աջափնյակ վարչական շրջանի նախկին ղեկավար Գևորգ Բաբայանին երեկ մեղադրանք է առաջադրվել: Ըստ  Քննչական կոմիտեի տարածած հայտարարության՝ նրան մեղադրում են պաշտոնեական լիազորությունները չարաշահելու մեջ: Լուրեր.com-ի թղթակիցը զրուցել է Բաբայանի հետ, պարզելու՝ նրա տեսակետն իրեն առաջադրված մեղադրանքի մասին:

Նա իր խոսքի սկզբում նշեց, որ ամիսներ առաջ իր՝ աշխատանքից հեռանալը ամենևին կապ չուներ այս մեղադրանքի հետ և ինքն աշխատանքից հեռանալիս՝ գաղափար էլ չուներ, որ իրեն մի օր մեղադրանք կառաջադրվի: 

«Քաղաքապետի հետ իմ պաշտոնավարման ընթացքում հարաբերությունները եղել են աշխատանքային, որոշ հարցերում համամիտ ենք եղել, որոշ հարցերում՝ ոչ, որոշ հարցերում քաղաքապետը գոհունակություն է հայտնել, որոշ հարցերում՝ ոչ: Աշխատանքից հեռանալու մասին քաղաքապետ Հայկ Մարությանի հետ երկար քննարկում եմ ունեցել, դրա արդյունքում մենք եզրահանգման ենք եկել, որ այդ պահին ճիշտը իմ հեռանալն է, բայց պատճառն, իսկապես, սա չէր»,- ասում է թաղապետը՝ չմանրամասնելով՝ վերջապես ինչն էր պատճառը:

Հարցին՝ իրեն մեղադրող աշխատակիցների և իր միջև ինչպիսի հարաբերություններ են եղել, Բաբայանը պատասխանեց. «Մեղադրողները իմ պաշտոնավարման օրոք աշխատած և հեռացված աշխատակիցներն են, որոնք չնայած պնդում են, որ մեղադրելու պատճառներն անձնական չեն, բայց ես գտնում եմ, որ անձնական են: Իրենց ես աշխատանքից հեռացրել եմ, բայց հաստիքի կրճատման հիմքով, դրանից հետո իրենք սկսել են ինչ-որ փաստեր ի հայտ բերել, չգիտեմ էլ՝ որտեղից: Մինչ այդ, մենք աշխատել ենք նորմալ, հանգիստ աշխատանքային մթնոլորտում, նրանք իմ դեմ լարվել են ազատվելուց հետո: Քննչականի համար սուտ մեղադրանքներն էլ իրենք են հնչեցրել, դրանց հիմքով էլ գործ է հարուցվել»: 

Նախկին թաղապետի խոսքով՝ ինքը միայն երեկ է իմացել հարուցված քրեական գործի մասին և անակնկալի եկել:

«Անկեղծ ասած քրեական գործ հարուցելուց ես ընդհանրապես տեղյակ չեմ եղել: Ինձ միայն երեկ առաջին անգամ հրավիրեցին Քննչական կոմիտե ու մեղադրանք առաջադրեցին: Ես տեղյակ էլ չէի քրեական գործից, ծանուցումները քաղաքապետարան են ուղարկվել, քաղաքապետարանից իրենց են ինչ-որ բաներ ուղարկվել, իսկ ես բանից անտեղյակ եմ մնացել»,- ասում է Բաբայանն ու պնդում, որ մեղադրանքը չի ընդունելու և անհամբեր սպասելու է, որ Քննչական կոմիտեն ապացուցի իր մեղավորությունը: 

Վարչական շրջանի նախկին ղեկավարի նկատմամբ որպես խափանման միջոց է ընտրվել ստորագրությունը չհեռանալու մասին: Նախաքննությունը շարունակվում է:

Գևորգ Բաբայանը թաղապետի պաշտոնում նշանակվել էր 2018-ի ավագանու ընտրություններից հետո, 2016-ից ներկայումս իշխող «Քաղաքացիական պայմանագիր» կուսակցության անդամ է: Աշխատանքից հեռացել է այս տարվա փետրվարին: Հիշեցնենք, որ Գևորգ Բաբայանի հրաժարականից հետո լրատվամիջոցները գրեցին, որ Բաբայանը հրաժարական է տվել ապօրինի շինարարության վերաբերյալ կազմված ակտը «կորցնելու» համար։ Ըստ հրապարակումների՝ նա Աջափնյակ համայնքի ազդեցիկ բնակիչներից մեկի հարազատներին 17-րդ թաղամասում երեք առանձնատուն կառուցելու հնարավորություն էր տվել՝ առանց թույլտվության: