Ինչու կորոնավիրուսի տուգանքների համար տրամադրված հաշվեհամարը չի գործել

Օրեր առաջ փաստաբան Գևորգ Գյոզալյանը բարձրաձայնել էր, որ ոստիկանությունը վարչական պատասխանատվության է ենթարկել իրեն՝ մեքենայում որդու հետ գտնվելու և դիմակ չդնելու համար։ Նա տուգանվել էր 10 000 դրամով, սակայն վճարում կատարելիս պարզվել էր, որ ոստիկանի կողմից տրամադրված 900005024030135 հաշվեհամարը գոյություն չունի: Ապա փաստաբանը եզրահանգում էր արել, որ այս ամենն ընդամենը ձև է․ «ՁԵՎ, ՁԵՎ և կրկին ՁԵՎ: Մտահոգները ինձ արգելում են որդուս հետ մեքենայում առանց դիմակի գտնվեմ (թեև ողջ օրը որդուս հետ տանն եմ), տուգանում են դրա համար, հետո ինձ ստիպում են գնալ բանկ, որտեղ բազմաթիվ հերթեր են, որտեղ իրոք մեծ է վտանգը վարակվելու, և չկա որևէ երաշխիք, որ բանկում տեղյակ են 900005024030135 հաշվեհամարից»,- գրել էր նա: Գրառման տակ մեկնաբանություններ թողած ընդդիմադիրները դժգոհություն էին հայտնում, իշխանության ներկայացուցիչները զարմանում, իսկ հանրությունը հորդորում էր հարցը դատարանում լուծել, քանի որ չի բացառվում, որ այդ գումարը ինչ-որ ՍՊԸ-ի հաշվին է գնալու։ ԼՈՒՐԵՐ․com-ը պարզաբանում ստացավ ոստիկանության լրատվական բաժնից․ «Ծանուցմամբ ներկայացված հաշվեհամարը իրական է, որով մինչև այս պահը վարչական իրավախախտմամբ ներկայացված տուգանքները վճարվում են։ Միգուցե տեխնիկական խնդիր է եղել»,- հայտնեցին ոստիկանությունից։