Թուրքիան փորձում էր խանգարել Սթիվի Ուանդերի ելույթը Հայոց ցեղասպանությանը նվիրված համերգին

«Թուրքական լոբբին ամեն ինչ անում էր, որպեսզի Սթիվի Ուանդերը չներկայանար համերգին. հավատացեք, որ դժվար բանակցություններ են եղել։ Բացի այդ՝ ահազանգեր կային՝ Ֆլորա Մարտիրոսյանին ֆիզիկական սպառնալիքների ենթարկելու: Մենք անհանգստացած էինք և մեծ ուշադրություն էինք հատկացնում այդ ամենին», - լրագրողների հետ հանդիպման ժամանակ, խոսելով Լոս Անջելեսում տեղի ունեցած՝ Ցեղասպանությանը նվիրված համերգի մասին, ասաց «Էֆ-Էմ-Էս» մեդիայի համահիմնադիր Արամ Սարգսյանը։

Նա նշեց, որ այդ ամենն իրենց չի վախեցնում, որովհետև մշակույթի միջոցով ավելի շատ կարելի է ներկայացնել Հայաստանը, քան այլ միջոցներով:

«Սա բարձր մակարդակի միջազգային համերգ էր», – նկատեց բեմադրիչ Ժիրայր Դադասյանը։

Ժիրայր Դադասյանի խոսքերով՝ Սփյուռքի մեր հայրենակիցները նշել են, որ նման համերգի երբեք չէին ներկայացել, և այս համերգը մեր սփյուռքահայերի ուղեղներում կմտցնի, որ, բացի «քյառթու» ռաբիսից, կա բարձրաճաշակ երաժշտություն, և կարող են գնալ ու ճաշակ զարգացնել: «Ի վերջո՝ այս համերգը նաև կրթական խնդիր է լուծում՝ բացի քաղաքական նպատակները կատարելուց, որովհետև գործ ունենք երաժշտական նյութի հետ», - ավելացրեց բեմադրիչը: