Մեկնարկեց «Հայության կրոնադավանական հատվածներ. մարտահրավերներ և հնարավորություններ» խորագրով միջազգային կոնֆերանսը

Դեկտեմբերի 9-ին Երևանում մեկնարկեց ՀՀ սփյուռքի նախարարության, «Հիքսոս» հիմնադրամի և «Նորավանք» գիտակրթական հիմնադրամի նախաձեռնությամբ կազմակերպված «Հայության կրոնադավանական հատվածներ. մարտահրավերներ և հնարավորություններ» խորագրով միջազգային գիտագործնական կոնֆերանսը:

Ներկա էին ՀՀ սփյուռքի նախարարի տեղակալ Արմեն Հայրապետյանը, ՀՀ կառավարության աշխատակազմի ազգային փոքրամասնությունների և կրոնի հարցերի վարչության պետ Վարդան Ասցատրյանը, «Նորավանք» գիտակրթական հիմնադրամի գործադիր տնօրեն Գագիկ Հարությունյանը, հասարակական, քաղաքական, կրոնական կազմակերպությունների, հայագիտական կենտրոնների ներկայացուցիչներ, գիտնականներ Հայաստանից և Սփյուռքից, ուսանողներ և այլք։

Քննարկվեցին հայության կրոնադավանական հատվածների ազգային ինքնության պահպանման և միջդավանական համերաշխության, համագործակցության մթնոլորտի ապահովման միջոցներին առնչվող և այլ հարցեր։

Զեկույցներով հանդես եկան «Նորավանք» ԳԿՀ գործադիր տնօրեն Գ. Հարությունյանը («Հայության կրոնադավանանքային խնդիրները գլոբալ զարգացումների համատեքստում»), ՀՀ կառավարության աշխատակազմի ազգային փոքրամասնությունների և կրոնի հարցերի վարչության պետ Վ. Ասցատրյանը («Հայության այլակրոն և այլադավան հատվածների հարաբերություններն ու միավորման խնդիրները»), Լիբանանի «Դպրոցական հայագիտության զարգացման կենտրոն»-ի վարիչ տնօրեն Վարդան Թաշճյանը («Միջհարանվանական գործակցությունը Լիբանանի հայ համայնքում, փորձառություններ և հեռանկարներ»), «Նորավանք» ԳԿՀ հայագիտական կենտրոնի ղեկավար Արիստակես Սիմավորյանը («Հայության դավանանքային հատվածների համախմբման ձևերը և մեխանիզները»), գիտնականներ Հայաստանից, Գերմանիայից, Սիրիայից և այլ երկրներից:

Գիտագործնական կոնֆերանսի արդյունքները կամփոփվեն այսօր՝ դեկտեմբերի 10-ին: