Սփյուռքը չի կարողանում համախմբվել

«Մենք երկար ժամանակ ենք պատրաստվել այս համագումարին», – այսօր «Հայելի» մամուլի ակումբում տեղի ունեցած ասուլիսի ժամանակ, ամփոփելով օրերս Փարիզում կայացած հիշյալ համագումարի արդյունքներն, ասաց ԱԺ պատգամավոր Արագած Ախոյանը։

Նա նշեց, որ սկզբում տարբեր երկրներում հայրենակցական միությունների համագումարներ են գումարվել, որոնք էլ ընտրել են Ֆրանսիայի համագումարին մասնակցող՝ իրենց ներկայացուցիչներին։

«Արևմտահայերի ազգային խորհուրդը Փարիզում կայացած ժողովին ստացել է համագումարի կարգավիճակ՝ Ֆրանսիայում գրանցվելով որպես հասարակական կազմակերպություն, այնուհետև փորձելով իր շուրջ համախմբել մնացյալ ուժերին», – ասաց ԲՀԿ ներկայացուցիչ Վահան Մելքոնյանը։

Համագումարին մասնակցել են ներկայացուցիչներ Հայաստանից, Ֆրանսիայից, ԱՄՆ-ից, Ռուսաստանից, Լիբանանից, Իրանից, իսկ Սիրիայի մասնակիցները բացակայել են՝ Ֆրանսիա մուտք գործելու արտոնագիր չստանալու պատճառով։

Վահան Մելքոնյանը տեղեկացրեց, որ հայությունը չի կարող ձևավորվել որպես գործոն. «Սփյուռքը չի կարողանում համախմբվել և ձևավորվել որպես գործոն, և այս համագումարից մենք դա դեռ չենք կարող պահանջել. այն իր առաջին քայլերն է կատարում», – նկատեց նա։

Արևմտահայերի 3րդ համագումարի Հայաստանի ներկայացուցիչները տեղեկացրեցին, որ Արևմտահայերի 3րդ համագումարն ընդունել է հայտարարություն, որը կհրապարակվի հետագայում։