Ներթիմային գզվրտոցը հասավ Սիսիան. «քայլած» ՔՊ-ականներն` ընդդեմ «նախկինների»

Սիսիանում կրկին կրքերը սրվել են. ՔՊ-ականները բաժանվել են երկու ճամբարի: Կռիվը քաղաքապետի աթոռի շուրջ է: Սիսիանցի ՔՊ-ական ակտիվիստ Արսեն Ավագյանը, ով եկեղեցու դեմ արշավի նախաձեռնողներից էր, բավարարված չէ իր կարգավիճակով. նրան ընդամենը քաղաքաշինության, տեխնիկական եւ հրդեհային անվտանգության տեսչական մարմնում ինչ-որ աշխատանք են տվել։ Էլի դժգոհ մարդիկ կան Սիսիանի իշխանամետների շրջանում, որոնք պայքար են սկսել քաղաքապետի ժամանակավոր պաշտոնակատար Արմեն Հակոբջանյանի դեմ: Վերջինիս աջակցում է նախկին ԲՀԿ-ական, սակայն հետո ՔՊ-ին հարած Կարեն Համբարձումյանը, ով նաեւ բարեկամական կապ ունի քաղաքապետի ԺՊ-ի հետ:

Սիսիանում սեպտեմբերին նույնպես ՏԻՄ ընտրություններ են սպասվում, և այս ֆոնին ներքին թիմային ռազբորկաները էապես նվազեցնում են ՔՊ-ի հաղթելու շանսերը, հատկապես, եթե ընդդիմությունը աշխատի միասնական ֆրոնտով: Ընդհանրապես, Սիսիանում հիմնական հարցերը որոշողը, ըստ էության, հենց Կարեն Համբարձումյանն է, և հենց նա է լինելու գալիք ընտրություններում Հակոբջանյանի գլխավոր հենարանը:  Մյուս թեւը համակարգում է Առուշ Առուշանյանի դեմ ցուցմունքներ հավաքագրող Ներսես Խաչատրյանը,  վերը նշված Արսեն Ավագյանը եւ ուղնուծուծով այլ ՔՊ-ականներ: Մամուլը գրել էր, որ այս երկու թևերի միջև հակամարտությունը բավական թեժ ընթացք է ստացել:  Կարեն Համբարձումյանը, օրինակ, վերջերս հորդորել է իր բարեկամ, քաղաքապետի ժամանակավոր պաշտոնակատար Արմեն Հակոբջանյանին՝ ազատել Արսեն Ավագյանի ազգականներին, որոնք աշխատում են համայնքային ենթակայության հիմնարկներում: Ավագյանի կինն էլ Սիսիանի երաժշտական դպրոցում է աշխատում: Ավագյանի բարեկամներն արդեն զգուշացվել են, որ ազատվելու են աշխատանքից:

Համբարձումյանի ազգականներն էլ իրենց Սիսիանում վատ չեն զգում; «Հայանտառ»-ի Սիսիանի մասնաճյուղի տնօրեն,  Կարեն Համբարձումյանի եղբայր Տիգրան Համբարձումյանն ամիսներ առաջ վիրավորական, հայհոյախառն արտահայտություններ է գրել Ֆեյսբուքի օգտատեր, Մոսկվայից Հայաստան եկած բլոգեր Մերի Տոմոյանի ուղիղ եթերի ժամանակ: Եվ գրելիս այն կարգի է ազարտի մեջ ընկել, որ վիրավորել ու հայհոյել է նաեւ զոհվածների հարազատներին։ Իհարկե, մնալով անպատիժ:

Թե ինչ հանգուցալուծում կունենա Սիսիանում ՔՊ ներքին պատերազմը՝ ցույց կտա ժամանակը, մի բան ակնհայտ է, այս իրավիճակից կարող են օգտվել ընդդիմադիր ուժերը, եթե, իհարկե, վերջիններս նույնպես չնախընտրեն աթոռակռիվը և ներքին գզվրտոցը: