ԱՄՆ-ն սպառնացել է պատժամիջոցներ սահմանել թուրքական ընկերությունների նկատմամբ

ԱՄՆ-ն սկսել է ավելի մեծ ճնշում գործադրել Թուրքիայի վրա՝ զգուշացնելով այդ երկրի ընկերություններին պատժամիջոցների տակ գտնվող Ռուսաստանի ֆիզիկական և իրավաբանական անձանց հետ համագործակցելու հետևանքների մասին։ Այս մասին հայտնում է The Wall Street Journal-ը՝ վկայակոչելով ԱՄՆ ֆինանսների նախարարության փաստաթղթերն ու աղբյուրները։

Օգոստոսի 22-ին ֆինանսների փոխնախարար Ադեուալ Ադեյեմոն նոտա է հղել Թուրքիայում գտնվող Ամերիկայի Առևտրի պալատին, որում ասվում է, որ թուրքական ընկերությունները կարող են ենթարկվել սահմանափակող միջոցների, եթե շարունակեն բիզնես վարել Ռուսաստանի հետ:

«Խնդրում ենք նկատի ունենալ, որ պատժամիջոցների ենթարկված Ռուսաստանի ներկայացուցիչների հետ գործարքները կարող են պատժամիջոցների ռիսկի ենթարկել թուրքական ֆինանսական և գործարար սուբյեկտներին», - ընդգծվում է փաստաթղթում։

Ադեյեմոն նաև նշել է, որ թուրքական բանկերը չեն կարող միաժամանակ թղթակցային հարաբերություններ ունենալ Ռուսաստանի և ԱՄՆ-ի կարգավորիչների հետ։

Նույն նամակը ստացել է արդյունաբերողների և ձեռներեցների թուրքական խոշորագույն ասոցիացիան՝ TUSAID-ը։

Ավելի վաղ Politico-ն հայտնել էր, որ Միացյալ Նահանգները կարող է խորհուրդ տալ արևմտյան ընկերություններին խզել տնտեսական կապերը Թուրքիայի հետ կամ լքել երկիրը, եթե Անկարան Մոսկվայի հետ «պաշտոնական տնտեսական գործընկերության» մեջ մտնի։