Սիրիան Թուրքիայից պահանջել է դադարեցնել երկրի տարածքի օկուպացիան

Սիրիայի արտաքին գործերի նախարար Ֆեյսալ Միքդադը հայտարարել է, որ Թուրքիան պարտավոր է դադարեցնել սիրիական տարածքների օկուպացիան, փոխանցում է ՏԱՍՍ-ը։ Նրա խոսքով՝ թուրքական ուժերի դուրսբերումը հատուկ վարչական շրջաններից` հանրապետության տարածքում անվտանգությունն ու կայունությունը վերականգնելու միակ ճանապարհն է։

«Մենք ոչ մի պայման չենք դնի, բայց թուրքական օկուպացիան պետք է ավարտվի Սիրիայի տարածքում, որոշ խմբերի աջակցությունը պետք է դադարեցվի, [անհրաժեշտ է] չմիջամտել Սիրիայի ներքին գործերին <…> [Թուրքիայի դուրսբերումը սիրիական տարածքներից] սա միակ ճանապարհն է, որպեսզի անվտանգությունն ու կայունությունը վերադառնան Սիրիայի տարածք»,- ասել է Միքդադը։

Ինչպես նշել է Սիրիայի ԱԳՆ ղեկավարը, հանրապետության տարածքը պետք է լքեն նաև ամերիկյան ուժերը։ Նա նաև կոչ է արել Վաշինգտոնին դադարեցնել հատուկ վարչական շրջանների ներսում անջատողական կազմակերպություններին աջակցությունը, քանի որ դա հանգեցնում է քաղաքացիական անձանց, այդ թվում՝ տարեցների և երեխաների մահվան: