Նյարդաբանները հայտնաբերել են «Դեմենցիայի» նոր տեսակ

Սթոնի Բրուքի համալսարանի գիտնականները պարզել են, որ Առևտրի համաշխարհային կենտրոնում տեղի ունեցած ահաբեկչությունից հետո որոշ որոնողափրկարարներ ձեռք են բերել «Դեմենցիայի» հատուկ տեսակ՝ հետտրավմատիկ սթրեսային խանգարման պատճառով: Հետազոտությունը հրապարակված է Journal of Alzheimer's Disease ամսագրում:

Հեղինակները ներառել են 99 փրկարարների (միջին տարիքը՝ 56 տարեկան), ովքեր մասնակցել են Առևտրի համաշխարհային կենտրոնում սեպտեմբերի 11-ի հարձակումներից հետո որոնողափրկարարական աշխատանքներին: Նրանցից ավելի քան 8%-ի մոտ առաջացել է վաղ ճանաչողական խանգարում: Մոտ 23%-ի մոտ ախտորոշվել է նաև քրոնիկ հետտրավմատիկ սթրեսային խանգարում: Ուսումնասիրության մասնակիցները համընկնել են տարիքի, սեռի, զբաղմունքի, ռասայի և կրթության առումով:

Հեղինակները կարծում են, որ ճանաչողական խանգարումների վաղ փուլում ուսումնասիրված հիվանդները ունեցել են վաղ նեյրոդեգեներատիվ գործընթաց, որը բնութագրվում է սպիտակ նյութի տրակտների փոփոխություններով: Նշվում է, որ սա այսպիսի առաջին ուսումնասիրությունն է։

Հիշեցնենք, որ «Դեմենցիան» (dementia) ձեռքբերովի թուլամտությունն է, նախկինում ձեռք բերած գիտելիքների և պրակտիկ հմտությունների այս կամ այն աստիճանի կորստով և նորերի ձեռք բերման դժվարացմամբ կամ անհարինությամբ, ճանաչողական ֆունկցիայի կայուն իջեցումն է: Ի տարբերություն օլիգոֆրենիայից` բնածին կամ մանկական հասակում ձեռք բերած թուլամտությունից, «Դեմենցիան» հոգեկան ֆունկցիաների քայքայումն է, որը տեղի է ունենում ուղեղի ախտահարման արդյունքում: