Խոշոր ավտովթար՝ Լոռու մարզում. բժիշկները պայքարում են վարորդի կյանքի համար

Այսօր՝ օգոստոսի 24-ին, խոշոր ավտովթար է տեղի ունեցել Լոռու մարզում: Ժամը  04:30–ի սահմաններում Լոռու մարզի բնակիչ, 31-ամյա Կամո Բարաբաշը իր վարած Opel Astra մակնիշի ավտոմեքենայով Բլագոդարնոյե- Տաշիր ավտոճանապարհի  2-րդ կմ հատվածում դուրս է եկել երթևեկելի գոտուց և գլխիվայր շրջվել:

Ինչպես հայտնում է Shamshyan.com-ը, վթարի հետևանքով Կ. Բարաբաշը ծայրահեղ ծանր ախտորոշմամբ տեղափոխվել է  «Տաշիր» բժշկական կենտրոն:

Դեպքի վայր են ժամանել ՀՀ ոստիկանության պարեկային ծառայության Լոռու գումարտակի պարեկները և ոստիկանության Տաշիրի բաժնի հերթապահ խումբը:

Վթարի մասին  պարեկային ծառայության Լոռու գումարտակից տեղեկությունը փոխանցել են Հայաստանի քննչական կոմիտեի Լոռու մարզային քննչական վարչության Ստեփանավանի քննչական բաժին, որտեղից ժամանել է քննչական խումբը՝  օրվա հերթապահ քննիչի գլխավորությամբ, ում կողմից նախաձեռնվել է վարույթ:

Քննիչի հանձնարարականով ավտոմեքենան տեղափոխվել է ոստիկանության Տաշիրի բաժնի պահպանվող հատուկ տարածք:

«Վանաձոր» բժշկական կենտրոն ՓԲԸ-ից հայտնում են, որ ավտովթարի հետևանքով Վանաձորի Բ/Կ տեղափոխված տղան վիրահատվել է, վիճակը կայունացվել, այնուհետ սանավիացիայի ուղղաթիռով տեղափոխվել Երեւան: 

«Այսօր՝ օգոստոսի 24-ին, առավոտյան ժամը 07:30-ին, Տաշիրի բժշկական կենտրոնից շտապ բուժօգնության մեքենայով, ծայրահեղ ծանր վիճակում Վանաձորի բժշկական կենտրոն է ընդունվել երիտասարդ տղա: Նա վնասվածքները ստացել է ավտովթարի հետեւանքով:

Տուժածի մոտ հայտնաբերվել է գանգուղեղային վնասվածք, գանգի ոսկրերի բազմակի կոտրվածքներ: Անմիջապես տեղափոխվել է վերակենդանացման բաժանմունք, միացվել արհեստական շնչառության սարքին, ցուցաբերվել անհրաժեշտ բուժօգնություն:

Վանաձորի բժշկական կենտրոնի նեյրովիրաբույժ Կարեն Բեկչյանի եւ վնասվածքաբան Արտյոմ Ներսիսյանի կողմից կատարվել է գանգի ռեզեկցիոն տրեպանացիա, սուբդուրալ հեմատոմայի հեռացում: Վիրահատությունից հետո վիճակը կայունացել է:

Հետագա նեղ մասնագիտական բուժումը շարունակելու նպատակով սանավիացիայի ուղղաթիռով տեղափոխվել է մայրաքաղաք Երեւան»,- ասված է հաղորդագրությունում: