Ռուսաստանում հավաստագրվել է առաջին անօդաչու ուղղաթիռը

Ռուսաստանում հավաստագրվել է BVS VT 440 ուղղաթիռի տիպի առաջին անօդաչու թռչող սարքը, հայտնում է РИА Новости-ն՝ հղում անելով Radar MMS ծրագրավորող ընկերության գործադիր տնօրեն Իվան Անցևի խոսքերին։

Նրա խոսքով՝ անօդաչու ուղղաթիռը ստացել է համարանիշ և արդեն կատարում է առաջադրանքներ՝ ելնելով Ռուսաստանի շահերից։ 440 կգ կշռող անօդաչու թռչող սարքը կարող է կրել 100 կգ օգտակար բեռ և օդում անցկացնել 4 ժամ՝ շարժվելով 150 կմ/ժ արագությամբ։ Այն կարող է առաքել բեռներ, վերահսկել տարածքները և իրականացնել հետախուզություն։

Ավելի վաղ հաղորդվել էր, որ ռուսական «Kronstadt» ընկերությունը կստեղծի «Thunder» արագընթաց բազմաֆունկցիոնալ անօդաչու թռչող սարքի նախագիծը։ Army 2022-ը նաև ցուցադրել էր օդային տարածքի կառավարման նորագույն համակարգը, որն ունակ է հետևել անօդաչու թռչող սարքերի խմբերին և որոշել դրանց տեսակը: