Իրավիճակ է փոխվել. Քաջարանում ՔՊ հույսը մականունավոր գործարարն է

Քաջարան համայնքում եւս սեպտեմբերի 25-ին ՏԻՄ ընտրություններ են նշանակված։ Քաջարանի համայնքապետի ՔՊ թեկնածուն, որի մասին վերջերս են հայտարարել, Արմեն Առաքելյանն է՝ «Զապո» մականունով, Քաջարանում չի երեւում, հանրային որեւէ միջոցառման չի մասնակցում։

Նա գործարար է, հյուրանոց ունի, ապրում է Երեւանում, սակայն հաշվառված է Քաջարանում։ Նախօրեին նա մասնակցել է ԶՊՄԿ-ի Սիսիանի քարի գործարանի բացմանը, ԶՊՄԿ գլխավոր տնօրեն Խուդոլինի կողքին է եղել։ Թերեւս փորձել է տպավորություն ստեղծել, որ իրեն ընտրելու դեպքում քաջարանցիներին կոմբինատում աշխատանքով կապահովի։ Հաշվի առնելով ՔՊ-ականների ինքնափիառի հանդեպ սերը և այն հանգամանքը, որ ընտրվելուց հետո վերջիններս անգամ չեն հիշում տված խոստումների մասին՝ խոսուն վկայություն է այն բանի, որ մականունավոր թեկնածուի այս փիառն էլ ընդամենը նախընտրական շոու է, ոչ ավելին:

Ի դեպ, հեղափոխության օրերին Նիկոլ Փաշինյանը ամբիոնից հայտարարում էր, որ իրենք, գալով իշխանության, կոտրելու են ՀՀԿ-ի կողմից հաստատված ավանդույթը, այն է՝ այլևս չեն լինելու գործարարներ պետական կառավարման համակարգում: Ինչպես տեսնում ենք՝ ՔՊ-ն հետ է կանգնել հանրությանը տված նաև այս խոստումից, և այժմ Քաջարանում հեղափոխական թիմի հույսը հենց գործարարն է, այն էլ Երևանում ապրող և Քաջարանի խնդիրներին ընդհանրապես անտեղյակ: Ի դեպ, հետաքրքիր է՝ իսկ Առաքելյանը պատրաստվո՞ւմ է հետևել օրենքի պահանջին և հրաժարվել իր բիզնեսից` պաշտոնը ստանձնելու դեպքում, թե՞ նախկինների ավանդույթներից այս հարցում էլ որևէ շեղում չի լինելու..