Ղազախստանը մեկ տարով կդադարեցնի ռազմական արտադրանքի արտահանումը

Ղազախստանի իշխանությունները մինչեւ 2023 թվականի սեպտեմբեր դադարեցնում են ռազմական արտադրանքի արտահանումը։ Համապատասխան որոշումն ընդունվել է պաշտպանական արդյունաբերության հարցերով հանձնաժողովի նիստում։ Այս մասին հայտնում է Ղազախստանի կառավարության Telegram-ալիքը։

Հանձնաժողովի անդամները՝ Ղազախստանի վարչապետ Ալիխան Սմայիլովի գլխավորությամբ, քննարկել են զենքի, ռազմական տեխնիկայի եւ ռազմական արտադրանքի արտահանումը մինչեւ 2023 թվականի օգոստոսի վերջը դադարեցնելու առաջարկը։ Առաջարկն արվել է արդյունաբերության եւ ենթակառուցվածքների զարգացման նախարարության կողմից։

«Այս առաջարկը հավանություն է ստացել հանձնաժողովի անդամների կողմից»,- հայտնում է Ղազախստանի կառավարությունը։

Օգոստոսի 22-ին տեղի է ունեցել Ղազախստանի Անվտանգության խորհրդի նիստ՝ նախագահ Կասիմ-Ժոմարտ Տոկաեւի գլխավորությամբ։ Այնուհետեւ քննարկվել են այս ոլորտում զենքի արտադրության եւ գնման, ինչպես նաեւ արտահանման վերահսկողության հարցերը։ Հանդիպման արդյունքում տրվել են համապատասխան հանձնարարականներ՝ չհստակեցնելով մանրամասները, գրում է «Կոմերսանտը»։