Բիլ Մավրիդիս. Վան Գրիգորյանը «բռնել է տալիս» իր աշխատողներին

Օրեր առաջ Lurer.com-ը հրապարակել էր մի հոդված, որին ի պատասխան «Գլոբալ Գոլդ Մայնինգ» ընկերությունը ներկայացրել էր փաստաթղթեր, որոնք նույնպես հրապարակվեցին մեր կայքում։ Խոսքը «ԳԳՄ» ընկերության և կանադացի գործարար Բիլ Մավրիդիսի խնդրի մասին է։

Հոկտեմբերի 19-ին մեր խմբագրության հետ նորից կապ հաստատեց ծագումով հույն կանադացի Բիլ Մավրիդիսը, և ներկայացրեց իր պատասխանը «ԳԳՄ» ընկերության ներկայացրած փաստաթղթերին։ Ստորև ներկայացնում ենք է Մավրդիսի պատասխանը.

«Նամակ՝

Եթե կարդաք արբիտրաժային դատարանի դատավորի որոշումը, այնտեղ նշված է, որ 2010-ի Մարտի 27-ի համաձայնագիրն այդպես էլ ուժի մեջ չմտավ և արբիտրաժային դատարանի կողմերը հետ են բերվել այն ամսաթիվ, երբ դեռ համաձայնագիրը ստորագրված չի եղել:

Համատեղ գործունեությունը սկսելու օրիգինալ համաձայնագիրը (սեպտեմբերի 28, 2009թ) դեռ ուժի մեջ է և այնտեղ նշված է, որ կողմերը համատեղ գործունեություն սկսելու են հնարավորինս շուտ: Ես կպայքարեմ այս իրավունքի համար:

Մեկ այլ գրառման մեջ ակնհայտ է դառնում, որ պարոն Վան Գրիգորյանը կաշառել է էներգետիկայի և բնական պաշարների նախարարության աշխատակիցներին, մասնավորապես կոնցեսիոն վարչության պետ պարոն Կորյուն Հակոբյանին, որը կեղծ դադարեցման ծանուցում է տրամադրել 2010-ի սեպտեմբերի 28-ին: Պարոն Վան Գրիգորյանն այս դադարեցման ծանուցումն օգտագործել է որպես հիմնական բացատրություն «Կալդերա» ընկերության հետ կնքած 2010-ի հոկտեմբերի 7-ի համաձայնագիրը չեղյալ հայտարարելու համար: Ավելի ուշ` 2011-ի մայիսին, այս դադարեցման ծանուցումն անվավեր համարվեց, քանի որ ապօրինի էր տրվել:

Պարոն Վան Զ. Գրիգորյանը և պարոն Աշոտ Պողոսյանը, ով նրա գլխավոր կառավարիչն է Հայաստանում, կեղծ և շփոթեցնող հայտարարություններ են անում Հայաստանում ԱՄՆ-ի դեսպանատանը` համոզելով ԱՄՆ-ի դեսպան Մարի Յովանովիչին այցելել վարչապետ Տիգրան Սարգսյանին, որպեսզի աջակցեն «Գլոբալ Գոլդ Մայնինգ»-ին: ԱՄՆ-ի դեսպանատունը 2011-ի հունիսի 14-ին նամակ է ուղարկում վարչապետ Տիգրան Սարգսյանին` խնդրելով օգնել «Գլոբալ Գոլդ Մայնինգ» ընկերությանը, և 2011-ի հունիսի 16-ին Սահմանադրական դատարանի դատավոր Ռուզաննա Հակոբյանը կտրուկ դադարեցրեց դատական գործը և որոշում կայացրեց ի օգուտ «Գլոբալ Գոլդ Մայնինգ»-ի, այն է՝ ավարտին հասցնել բաժնետոմսերի գրանցման համատեղ գործարքը: Մանրամասներին կարող եք ծանոթանալ իմ Facebook-յան էջում. http://www.facebook.com/InvestigateGBGDCorruptionInArmenia

Պարոն Վան Գրիգորյանը հանձնարարել է իր իրավախորհրդատու պարոն Հրայր Ղուկասյանին քրեական բողոք ներկայացնել 2010-ի սեպտեմբերին, այնուհետև կաշառել է պարոն Աֆանդյանին` գլխավոր դատախազի տեղակալին, որ վերջինս սկսի քրեական հետախուզությունը: Պարոն Ա.Աֆանդյանը կամ կաշառակեր է, կամ էլ հիմար, որ որոշում է կայացրել իրավական հիմք չունեցող քրեական հետախուզություն սկսել 2010-ի նոյեմբերի 3-ին:

Ցավոք սրտի, նմանօրինակ խաբեությունները պարբերաբար կրկնվել են Հայաստանում պարոն Վան Գրիգորյանի կողմից: Նա Հայստանում չի վճարում իր աշխատողներին և երբ վերջիններս դիմում են քայլերի, պարոն Վան Զ. Գրիգորյանը հանձնարարում է քրեական բողոք հարուցել իր աշխատողների դեմ»: