Der Standard. Լիբանանում գեներալ Վիսամի հուղարկավորմանը կրակահերթ է հաջորդել

Լիբանանի մայրաքաղաք Բեյրությում կիրակի օրը՝ կեսօրին, կազմակերպվեց մայրաքաղաքում հնչած պայթյունի զոհ դարձած հետախուզական ծառայության պետ, գեներալ Վիսամ ալ Հասանի հուղարկավորման արարողությունը: Երկուշաբթի գիշերը դրան կրակահերթ է հաջորդել:

Անկարգությունները, որոնք ընթանում են Սիրիայի նախագահ Բաշար Ասադի վարչակարգի կողմնակիցների և ընդդիմադիրների միջև, սկիզբ էին առել ուրբաթ օրը Բեյրութում հնչած պայթյունի արդյունքում, որին զոհ էր դարձել գեներալ Վիսամ Հասանը: Վերջինիս թաղման արարողությունից հետո երկրում նոր կրակոցներ և անկարգություններ ծայր առան:

Բացի այդ՝ երկրի հյուսիսային նավահանգստային Տրիպոլի քաղաքում փոխհրաձգություն է սկսվել Բաշար Ասադի կողմնակիցների և հակառակորդների միջև, որի արդյունքում դիպուկահարի արձակած գնդակից զոհվել է մի կին. հաղորդում է թերթի թղթակիցը, իսկ լիբանանյան ANI գործակալությունը հայտնում է ևս մի աղջկա սպանության մասին: Դաժան բախումների ընթացքում կիրառվել է նաև ծանր հրետանի և զինամթերք:

Իրավիճակը երկրում լարվել էր Սիրիայի նախագահի ռեժիմի սուր քննադատ սուննի գեներալ Վիսամ Հասանի սպանությունից հետո: Թաղման ժամանակ ցուցարարները փողոցում լոզունգներ էին վանկարկում Սիրիայի ռեժիմի և շիական «Հիզբոլլահի» դեմ, որն աջակցում է Սիրիայի իշխանություններին զինված ապստամբների դեմ պայքարում: Ցուցարարների զայրույթն ուղղվել է Լիբանանի վարչապետ Նաջիբ Միքաթիի դեմ, որին ցուցարարները մեղադրում են գեներալ Վիսամի սպանության մեջ: