Բողոքի ակցիա Քուվեյթում. Կա ավելի քան 100 վիրավոր

Քուվեյթում ավելի քան 100 մարդ, այդ թվում` 11 ոստիկան է վիրավորվել ցուցարարների և իրավապահ մարմինների բախման արդյունքում. հաղորդում է ИТАР-ТАСС-ը՝ հղում կատարելով տեղական իշխանություններին:

Ակցիայի մասնակիցները հանդես էին գալիս ընտրական օրենսգրքում կատարվող փոփոխոխությունների դեմ: Անցյալ ուրբաթ Քուվեյթի էմիր Սաբահ ալ Ահմեդ ալ Ջաբար Աս Սաբահը հայտնել է, որ «նախարարների խորհրդին հրաման է տվել ընտրակարգի մեջ փոփոխություններ կատարելու մասին՝ նպատակ ունենալով ամրապնդել ազգային միասնականությունն ու ժողովրդավարությունը»: Պետության ղեկավարը նպատակ ունի ստեղծել միասնական ընտրական հանձնաժողով և կազմակերպել նախընտրական քարոզարշավ:

Ընդդիմությունը, որի կազմում են իսլամիստներն ու տեղական տոհմերի ներկայացուցիչները, կարծում են, որ փոփոխություններն առավելություններ են տալիս կառավարամետ ուժերին և բոյկոտել են դեկտեմբերի 1-ին կայանալիք խորհրդարանական ընտրությունները:

Կիրակի օրը երկրում ցույցի է դուրս եկել 30-100 հազար քաղաքացի: Բողոքի ցույցերը վերածվել են ոստիկանության հետ բախումների, որի արդյունքում տուժել է 11 ոստիկան. հայտնում են Քուվեյթի ՆԳՆ-ից: