Քոքոբելյանը գնաց կարճաժամկետ և սխալ ընտրված ճանապարհով. Արմեն Մարտիրոսյան

ԱԺ հինգերորդ գումարման հերթական քառօրյայի նիստից առաջ «Ժառանգություն» խմբակցության ղեկավար Ռուբեն Հակոբյանը հայտարարեց, որ այսուհետ «Ազատ Դեմոկրատներ» կուսակցության ղեկավար Խաչատուր Քոքոբելյանը ոչ մի ֆորմատով չի ներկայացնելու «Ժառանգություն» խմբակցությունը։ Ի պատասխան Հակոբյանի հայտարարությանը՝ Քոքոբելյանն ասաց. «Ես և Ալեքսանդր Արզումանյանն այսուհետ, ֆորմալ առումով մնալով խմբակցության անդամ, կներկայացնենք «Ազատ Դեմոկրատներ»-ի տեսակետը»։

Այս առթիվ Lurer.com-ը զրուցեց «Ժառանգություն» կուսակցության փոխնախագահ Արմեն Մարտիրոսյանի հետ. «Խիստ ցավ եմ ապրում, քանի որ «Ժառանգության» կողմից երբեք ոչ մի քայլ չարվեց ընդդեմ «Ազատ Դեմոկրատներ» կուսակցության, ընդամենը Րաֆֆի Հովհաննիսյանը, կապված իր և Խաչատուր Քոքոբելյանի անձնական պայմանավորվածությունը չկատարելու հետ, հայտարարություններ արեց, ուստի եթե նման ձևով է «Ժառանգության» բարի կամքին պատասխանում, դա իրենց խնդիրն է, բայց մենք, այնուամենայնիվ, հույս ունեինք, որ նորմալ համագործակցություն կընթանար»,-ասաց Արմեն Մարտիրոսյանը։

Կուսակցության փոխնախագահի խոսքով՝ «Ժառանգության» այն մոտեցումը, որ անհրաժեշտ է ավելի լայն  կոնսոլիդացիա ապահովել՝ ներգրավելով քաղաքացիական հասարակության ներկայացուցիչներին, համապատասխան արձագանք Խաչատուր Քոքոբելյանի մոտ չգտավ և ինքն ընդամենը գնաց կարճատև և սխալ ընտրված ճանապարհով։