Շարունակվում է «Հարսնաքար»-ի գործով դատավարությունը

Երևանի Ավան և Նոր Նորք վարչական շրջանների դատարանում դատավոր Դավիթ Հարությունյանի նախագահութամբ այսօր սկսվեց «Հարսնաքար» ռեստորանային համալիրում հունիսի 17-ի բռնարարքի գործով դատաքննությունը:

Ըստ մեղադրական եզրակացության՝ ամբաստանյալներ Գարիկ Մարգարյանը, Դավիթ Ադամյանը, Արթուր Բաբլոյանը, Արման Բաղդասարյանը, Արման Խաչատրյանն ու Նորայր Հայրապետյանը մեղադրվում են այն բանի համար, որ ծեծի են ենթարկել տուժողներ Վահե Ավետյանին, Արտակ Բայադյանին, Գարիկ Սողոմոնյանին, Արկադի Աղաջանյանին և Էդգար Նիկոյանին' Վահե Ավետյանի առողջությանը դիտավորությամբ պատճառելով կյանքի համար վտանգավոր ծանր վնաս, որն անզգուշությամբ առաջացրել է վերջինիս մահը, Արտակ Բայադյանի և Գարիկ Սողոմոնյանի առողջությանը' միջին ծանրության վնաս' առողջության տևական քայքայումով, իսկ Արկադի Աղաջանյանին և Էդգար Նիկոյանին ծեծի արդյունքում մարմնական վնասվածքներ չեն պատճառվել:

Պաշտպանական կողմը միահամուռ դժգոհություն հայտնեց մեղադրական եզրակացության պնդմանը, թե ամբաստանյալները գործել են մեկ միասնական դիտավորությամբ՝ միմյանց փոխլրացնելով: Պաշտպանական կողմը գտնում է, որ նախաքննական մարմինը պետք է անհատականացներ յուրաքանչյուրի գործողություններն ու դրանց հետևանքով պատճառված վնասները: Ամբաստանյալները հայտարարեցին, որ իրենց պարզ չէ, թե կոնկրետ ինչի համար է իրենց մեղադրանք առաջադրվել, ուստի իրենց մեղավոր չեն ճանաչում ներկայացված մեղադրանքում: Իսկ ամբաստանյալ, համալիրի մատուցող Դավիթ Ադամյանը նույնիսկ հայտարարեց, որ ինքը դեպքի վայրում չի եղել ու վիճաբանությանը չի մասնակցել: Ըստ մեղադրական եզրակացության, Դ.Ադամյանը դիտողություն է արել տուժող Վահե Ավետյանին, ապա նաև բռունցքով հարվածել նրան:

Մեղադրող Արթուր Դավթյանն իր հերթին հայտարարեց, որ ամբաստանյալների արարքները ճիշտ են որակվել, տվյալ դեպքում առկա է համակատարման եղանակով հանցակցության ինստիտուտի կիրառումը:

Ամբաստանյալ Արման Խաչատրյանի պաշտպան Ավագ Լալայանը դատարանից մեկ օր ժամանակ խնդրեց մեղադրողին բացարկ հայտնելու համար: Դատարանը տրամադրեց կես ժամ ժամանակ, դատական նիստը ընդմիջվեց:

ՓԱՍՏԻՆՖՈ