Ալեքսանդր Արզումանյանը զոհ գնաց այս ամենին. Ռուբեն Հակոբյան

Այսօրվա խմբակցության նիստում քննարկեցինք այդ հարցը և որոշեցինք, որ հետայսու պարոն Քոքոբելյանը չի ներկայացնում «Ժառանգություն»–ը որևէ ձևաչափով։ Լրագրողների հետ զրույցում ասաց ԱԺ «Ժառանգություն» խմբակցության ղեկավար Ռուբեն Հակոբյանը։ 

Թե ինչ խնդիր է եղել սկզբում «Ժառանգության» ու «Ազատ դեմոկրատների» միջև «Ժառանգություն» խմբակցության ղեկավար Ռուբեն Հակոբյանը լրագրողների հետ զրույցում ասաց, որ խնդիրը և՛ անձնական է, և՛ քաղաքական։

«Որոշակի պայմանավորվածություններ են լինում խմբակցությունների ներսում և միջկուսակցական հարաբերություններում, և այդ հարաբերությունների զգալի չափը խախտվել էր։ Ես հիմա չեմ ուզում մանրամասն սրանց անդրադառնալ, բայց սա օրվա հարց չի եղել։ ԱԺ ընտրություններից հետո են այս հարցերը կուտակվել, և ըստ էության, Քոքոբելյանն իրեն դուրս էր դրել խմբակցությունից։ Եթե ուշադրություն դարձրել եք, որևէ ելույթ չի ունեցել ԱԺ–ում»,– ասաց Հակոբյանը։ 

Հիշեցնենք, որ Րաֆֆի Հովհաննիսյանի և Խաչատուր Քոքոբելյանի միջև պայմանավորվածությունը մանդատները վայր դնելու շուրջ էր։ Խաչատուր Քոքոբելյանը, սակայն, օրերս հերքել էր, որ նման պայմանավորվածություն է եղել, նշելով, որ թյուրըմբռնում է եղել։

Հակոբյանն ասաց, որ Րաֆֆի Հովհաննիսյանը բացարձակ ճշմարտությունն է բարձրաձայնել. «Ես չեմ կարծում, որ որևէ մեկը կկասկածի Րաֆֆի Հովհաննիսյանի պարկեշտության վրա, որ դա այդպես է, իսկ Խաչատուր Քոքոբելյանը, փոխանակ այլ փաստարկներով խոսեր, հերքեց դա»։

Անդրադառնալով հարցին, հնարավոր է, որ «Ժառանգությունը» հասնի նրան, որ Քոքոբելյանը վայր դնի մանդատը,  Հակոբյանն ասաց. «Մենք չէ, որ պետք է դրան հասնենք։ Ի վերջո, նաև բարոյականության հարց է առաջանում։ Մարդը պետք է գեղեցկացնի մանդատը և ոչ թե մանդատը՝ մարդուն։ Իր որոշելիքն է»։

Անդրադառնալով նախկինում եղած այն խոսակցություններին, որ «Ժառանգություն»–«Ազատ դեմոկրատներ» դաշինքը ԱՄՆ-ի պարտադրությամբ էր, Հակոբյանն ասաց, որ դա եղել է երկու կուսակցությունների պայմանավորվածությունը. «Ժառանգության անունից հայտարարում եմ, որ որևէ տեղից որևէ ցուցում կամ պայման չի եղել։ Եթե լիներ, հավատացեք, որ այս ճակատագիրը չէր ունենա»։

Խոսելով նաև Խաչատուր Քոքոբելյանի հայտարարության մասին, որ ամեն ինչ կատարվում է նախագահական ընտրություններին ընդառաջ՝ Ռուբեն Հակոբյանն ասաց. «Ես չգիտեմ՝ նա ինչ է ասել, բայց եթե նա այն մարդը մնար, ով պայմանավորվածությունների դաշտում մնար, նման բան չէր լինի։ Ցավում եմ, որ չկարողացավ հասկանալ, որ իր պահվածքով հարվածի տակ դրեց և՛ իր կուսակցությանը, և՛ Ալեքսանդր Արզումանյանին, ով զոհ գնաց այս ամենին»։

Խոսելով նաև այն մասին, որ ԱԺ նիստի ընթացքում Քոքոբելյանը պահանջեց «Ժառանգություն» խմբակցության հրաժարականը՝ նրա փոխարեն առաջարկելով Զարուհի Փոստանջյանի թեկնածությունը, Հակոբյանն ասաց.

«Խմբակցության ղեկավարը ընտրվել է ձայների մեծամասնությամբ՝ առանց դեմի։ Ցավում եմ, որ իրեն այդպես է դրսևորում պարոն Քոքոբելյանը»։