Արոտավայրերի բարելավման ծրագրի առաջին փուլը բարեհաջող է անցել

Այսօր` հոկտեմբերի 22-ին, ՀՀ գյուղատնտեսության նախարար Սերգո Կարապետյանն ընդունել է Համաշխարհային բանկի «Համայնքների գյուղատնտեսական ռեսուրսների կառավարման և մրցունակության ծրագրի» գյուղական զարգացման մասնագետ և թիմի ղեկավար Նիկոլաս Ահուիսուսիին և Համաշխարհային բանկի հայաստանյան գրասենյակի պատասխանատու Արուսյակ Ալավերդյանին:

Հանդիպման նպատակն իրականացվող ծրագրի ընթացքի դիտարկումների արդյունքներն ու նոր ծրագրի թիրախային առաջարկներին ծանոթանալն էր:

Բարձր գնահատելով արոտավայրերի բարելավման ծրագրի իրականացման ընթացքը և շնորհակալություն հայտնելով համագործակցության համար, պարոն Ահուիսուսին նշել է, որ նման դրական միտումները կայուն նախադրյալներ են ապահովում նոր ծրագրին:

«Ծրագրի իրականացումը շատ համաչափ ու դինամիկ է ընթանում: Զգացվում է , որ այն Ձեր մշտական ուշադրության կենտրոնում է: Եվ արդյունքներն էլ գոհացուցիչ են»,-նշել է պարոն Ահուիսուսին:

Երկրորդ ծրագիրը նույնպես կունենա մի քանի բաղադրիչներ` նոր համայնքների ընդգրկում այսօր գործող ծրագրում, զարգացման արժեշղթայի բոլոր օղակների հստակեցում և աջակցություն ՀՀ գյուղատնտեսության նախարարությանը Համաշխարհային բանկի կողմից Հայաստանում իրականացվող գյուղատնտեսական ծրագրերի իրականացման գործում:

Շնորհակալություն հայտնելով Համաշխարհային բանկի կողմից ոլորտին ցուցաբերվող աջակցության համար` ՀՀ գյուղատնտեսության նախարարը նույնպես բարձր է գնահատել արոտավայրերի բարելավման ծրագրի իրականացման ընթացքը և պատրաստակամություն հայտնել ըստ ամենայնի օժանդակել նոր ծրագրերի իրականացմանը :

«Ցանկալի կլիներ, որ ծրագրի շրջանակներում Համաշխարհային բանկը հնարավորություն ունենար մեզ օգնելու ձեռք բերել սաղմի փոխպատվաստման լաբորատորիա , որն այնքան կարևոր է այսօր հոտի տոհմային կազմի բարելավման, կարճ ժամկետում բարձր մթերատու կենդանիներով այն համալրելու գործում»,- նշել է նախարարը:

Պարոն Ահուիսուսին խոստացել է իր ղեկավարների քննարկմանը ներկայացնել առաջարկված գաղափարը և հնարավորինս օժանդակել նոր ծրագրում այն ընդգրկելուն: