Թե ինչու ՀԱԿ-ը թիվ 1-ում թեկնածու չի առաջադրել (տեսանյութ)

Հոկտեմբերի 18-ին ավարտվեց Ավանի թիվ 1 և Գյումրու թիվ 35 ընտրատարածքներում մեծամասնական ընտրակարգով Ազգային ժողովի պատգամավորի թեկնածուների առաջադրումը։

Թիվ 1 ընտրատարածքում՝ ոչ, իսկ թիվ 35 ընտրատարածքում ՀՀՇ-ն առաջադրել է Մուրադ Գրիգորյանին:

Լուրեր.com-ի հետ զրույցում ՀԱԿ համակարգող, «Հայ ազգային կոնգրես» խորհրդարանական խմբակցության ղեկավար Լևոն Զուրաբյանը, պատասխանելով հարցին, թե ինչու ՀԱԿ-ը թիվ մեկ ընտրատարածքում թեկնածու չի առաջադրել, ասաց. «Մենք բոլոր որոշումներն ընդունում ենք կոնկրետ իրավիճակից ելնելով. որտեղ կա ինչ-որ իմաստ, քաղաքական նպատակներ դնել և դրանց հասնել, այնտեղ առաջադրում ենք:

Չգտնվեց որևէ կոնկրետ պլան, որը բոլորի համար ընդունելի լիներ: Ճիշտ է, քաղխորհուրդը դեռ վերջնականապես այդ հարցը պետք է լուծի գալիք չորեքշաբթի նիստում, որտեղ կոնգրեսի աջակցության հետ կապված հարցը կորոշվի», - ասաց Զուրաբյանը: 

Հիշեցնենք, որ Ավանի թիվ 1 ընտրատարածքում առաջադրվել է 4 թեկնածու՝ ՀՀԿ-ից՝ Ռոբերտ Սարգսյանը, «Ժառանգություն»-ից՝ Ստյոպա Սաֆարյանը, «Սոցիալ-էկոլոգիական դաշինքի» ղեկավար Արմենակ Դովլաթյանն ու ինքնաառաջադրված Էդուարդ Պետրոսյանը։

Թիվ 35 ընտրատարածքում առաջադրվել է 3 թեկնածու՝ «Սովրանո» ՍՊԸ տնօրեն Արման Սահակյանը՝ ՀՀԿ-ից, անկուսակցական Արման Խաչատրյանը և ՀՀՇ-ից՝ Մուրադ Գրիգորյանը։

Նշենք, որ ընտրություններն անցկացվելու են ս.թ դեկտեմբերի 2-ին, նախընտրական քարոզարշավը կմեկնարկի նոյեմբերի 4-ին և կավարտվի նոյեմբերի 30-ին։