5 ամենավտանգավոր դիետաները

Դիետոլոգները կազմել են 5 ամենավտանգավոր դիետաների ցուցակը, գրում է Комсомольская правда-ն: Առաջին տեղում է դեղահաբային դիետան: Գովազդվող հաբերը, որոնք խոստանում են մեկ ամսվա ընթացքում օգնել հրաժեշտ տալ ավելորդ կիլոգրամներին, լռում են դրանց վտանգավոր հակազդեցությունների մասին:

Երկրոդ ամենավտանգավոր դիետաների շարքում է հեղուկային դիետան, երբ սնվում ենք միայն հեղուկ սնունդով: Դա վտանգավոր է այն առումով, որ խոչընդոտում է աղեստամոքսային տրակտի նորմալ աշխատանքին, քանի որ օրգանիզմին պետք է նաև կոշտ սնունդ, որը ակտիվացնում է նրա աշխատանքը կարգավորող ֆերմենտների արտադրությունը, պնդում են դիետոլոգները:

Երրորդ տեղը զբաղեցնում է մոնոդիետան, երբ սնվում ենք միևնույն տեսակի սնունդով և միայն դրանով՝ խնձոր, հնդկաձավար, վարսակաձավար: Գիտնականներն ապացուցել են, որ նման դիետան զրկում է օրգանիզմը անհրաժեշտ սննդամթերքներից: Նման դիետաների դադարեցումից հետո օրգանիզմը սկսում է վերադարձնել իր կորցրած կիլոգրամները:

Չորրորդ տեղը զբաղեցնում է վերջին ժամանակներս տարածում գտած սպիտակուցային դիետան, որը ենթադրում է սննդակարգում միայն բացառապես ձկնեղենի և մսի օգտագործում որպես սպիտակուցների աղբյուր՝ բացառելով խմորեղենի, մրգերի և բանջարեղենի օգտագործումը: Նման դիետայի դեպքում օրգանիզմ մտնող սպիտակուցները սկսում են վերամշակվել ածխաջրերի, և այդ վերամշակման արդյունքում արտադրվում են թույներ, որոնք վտանգավոր են առողջության համար, քանի որ վնասում են նյութափոխանակությանը և երիկամներին:

Հնգյակը եզրափակում է քաղցր դիետան, որի դեպքում օրգանիզմում կուտակվում են չափից շատ ածխաջրեր: Դրանց ավելցուկը առաջացնում է թուլություն և գլխացավ: