Էդուարդ Շարմազանով. Մայիսի 4-ին եղել է դժբախտ դեպք, իսկ Մարտի 1-ին բախում է տեղի ունեցել

«Խնդիրն իրավական է, ես կխնդրեի բոլոր հարցերով դիմեք նախաքննական և քննող մարմիններին, այստեղ խնդիրը քաղաքական չէ։ Խոսելով մայիսի 4–ի ընտրությունների մասին՝ ասաց ԱԺ ՀՀԿ խոսնակ Էդուարդ Շարմազանովը՝ պատասխանելով Լուրեր.com–ի լրագրողի այն հարցին, թե ինչու է գաղտնի պահվում այն ՀՀԿ-ականի անունը, ով պատվիրել էր փուչիկները:

Խոսելով Սերոբ Բոզոյանի դատավարության մասին՝ Շարմազանովն ասաց, որ ի վերջո Հանրապետականն ավելի շատ լիազորություն չունի, քան նախաքննող, իրավապահ մարմինը. «Իրավապահ մարմինը կայացրել է Սահմանադրական օրենքով իր վրա դրված գործառույթները։ Բոլոր հարցերով դիմե՛ք իրենց։ Ես երբեք իրավական խնդիրներին գնահատականներ չեմ տալիս»։

Լրագրողի այն դիտարկմանը, թե փաստորեն Հանրապետականում անպատժելիություն է տիրում, Շարմազանովը ժխտեց և նշեց, որ  ՀՀԿ-ի համար օրենքի խախտումը կուսակցական պատկանելությամբ չի սահմանվում և ի պատասխան լրագրողի այն դիտարկմանը, որ պայթյունն եղել է ՀՀԿ-ականների պատճառով, Շարմազանովն ասաց. «Այդ ամենը չի եղել ՀՀԿ-ի պատճառով, եղել է դժբախտ դեպք»։ 

ՀՀԿ խոսնակը տեղյակ չէր՝ մայիսի 4–ի պայթյունի հետևանքով վիրավորներին փոխհատուցում տրվել է, թե՝ ոչ. «Ո՛չ գործով վկա եմ անցել, ո՛չ գործով ներկա եմ անցել»,– ասաց Շարմազանովը։

Նա նշեց նաև, որ շատ նորմալ է, որ պետբյուջեից տուժածների բուժման համար միջոցներ են ծախսվել. «Բոլորը մեր երեխաներն են եղել, ի՞նչ կապ ունի՝ դեպքը Հանրապետականի, թե՝ Բարգավաճի հանրահավաքի ժամանակ է եղել։ Եթե Ձեզ համար յուրայիններ և օտարներ կան, մեզ համար բոլորը յուրայիններ են։ Աստված չաներ, եթե ՀԱԿ–ի միտինգին լիներ կամ մեկ այլ տեղ, նույն կերպ համապատասխան նախարարությունները կփոխհատուցեին»։

Լրագրողի այն դիտարկմանն ի պատասխան, թե այդ դեպքում Մարտի 1–ին ինչու տուժածների բուժման համար պետական բյուջեից միջոցներ չեն հատկացվել, Շարմազանովն ասաց. «Մարտի 1-ին այլ բան է եղել, որի մասին չեմ ուզում խոսել: Մայիսի 4-ին եղել է դժբախտ դեպք, իսկ Մարտի 1-ին բախում է տեղի ունեցել»: