Շվեյցարացիները տպավորված են

Հոկտեմբերի 22-ին ՀՀ ԱԻ նախարար Ա. Երիցյանն ընդունել է Շվեյցարիայի զարգացման և համագործակցության գործակալության (ՇԶՀԳ, SDCA) պատվիրակությանը, որը գլխավորում էր գործակալության գլխավոր տնօրենի օգնական, մարդասիրական հարցերով վարչության ղեկավար Մանուել Բեսլերը։ Հանդիպմանը ներկա էին նաև ՇԶՀԳ Եվրոպայի և Միջերկրածովյան բաժանմունքի ղեկավար Բուրգի Ռոսը, տարածաշրջանային գրասենյակի տնօրենի տեղակալ, մարդասիրական ծրագրի ղեկավար Մաթիաս Վայնգարթը, ԱՌՆ հարցերով պատասխանատու Էվելին Շտուդերը և Հայաստանում ՇԶՀԳ ծրագրերի համակարգող Սերգեյ Հովհաննիսյանը:

Հանդիպման հիմնական նպատակն էր ամփոփել մինչև հիմա իրականացված ծրագրերի արդյունքներն ու նախանշել համագործակցության հետագա ուղիները։

Նախարար Ա. Երիցյանը շվեցարացի գործընկերներին շնորհակալություն հայտնելով համագործակցության համար՝ հանգամանալից ներկայացրեց նախարարության աշխատանքը. «Նախ և առաջ, ուզում եմ շնորհակալություն հայտնել մեր կողքին ամուր կանգնելու համար։ Մեր հզորությունը և այն, որ մենք միանգամից մի քանի քայլ առաջ ենք գնացել, մեծապես նաև ձեր շնորհիվ է։ ԱԻ նախարարությունը Հայաստանում ամենաերիտասարդն է՝ ստեղծված ընդամենը 4 տարի առաջ, սակայն մեր ճգնաժամային կառավարման կենտրոնն արդեն համարվում է տարածաշրջանում լավագույններից մեկը և վայելում բնակչության մեծ վստահությունը։ Համեմատության համար ասեմ, որ մոտ 5 ամսվա ընթացքում մեր «911» ծառայությունը ստացել է շուրջ 800 հազար ահազանգ, որոնցից ոչ մեկն անարձագանք չի մնացել։ Օրվա ընթացքում 4-5 հազար զանգ է սպասարկվում։ Շուտով մեր նորակառույց ՃԿԿ-ում աշխատանքի է անցնելու նաև 25-30 հաշմանդամ։ Ձեր աջակցությունը վստահություն է ներշնչում, որ մենք շարունակելու ենք գնալ առաջ»։

Սա Մանուել Բեսլերի առաջին այցն էր Հայաստան, և նա շնորհակալություն հայտնեց ԱԻ նախարարին՝ ջերմ ընդունելության համար.«Շատ տպավորված եմ մեր համագործակցության արդյունքներով ու տեսնելով, թե ինչքան ջանքեր են ներդրվում Հայաստանում աղետների ռիսկի նվազեցման համար։ Շվեյցարիան ևս հետաքրքրված է այդ ոլորտում տարվող աշխատանքներով, և կուզենայինք իմանալ, թե ուրիշ ո՞ր ուղղություններով կարող ենք շարունակել մեր համատեղ աշխատանքը»։

Ա. Երիցյանը նշեց ԱԻՆ զարգացման առաջիկա ուղղությունները, որտեղ շվեյցարացիների փորձագիտական և տեխնիկական աջակցությունը շատ գնահատելի կլինի։ Դրանք են՝ Գառնիի դիտարանի վերագործարկում, բոլոր մարզերում ՃԿԿ-ների հիմնում, փրկարար ծառայության շնաբանական և ականազերծման ծառայությունների, աղետների բժշկության զարգացում։

Պարոն Բեսլերը պատրաստակամություն հայտնեց շարունակել և խորացնել ԱԻ նախարարության հետ համագործակցությունը՝ հնարավորինս աջակցելով մեր ջանքերին։ «Այսպիսի բարձր մակարդակում ունենալով այսպիսի փորձառու գործընկեր՝ մենք վստահ ենք, որ մեծ հաջողություն ենք արձանագրելու»,- նշեց Մանուել Բեսլերը։

Հանդիպման ավարտին շվեյցարացի հյուրերն ԱԻ նախարար ուղեկցությամբ այցելեցին ՃԿԿ, որտեղ ծանոթացան դրա առաքելությանը, կառուցվածքին, տեխնիկական զինվածությանն ու տվյալների բազային։