«Վանա ծովուն արշալույսը» արժանացել է հույն հանդիսատեսի ջերմ ընդունելությանը

Ս. թ. հոկտեմբերի 5-12-ը Կորինթիայի Լուտրակի քաղաքում «Կյանքն իբրև տոն» կարգախոսով անցկացվել է Պելոպոնեսի առաջին միջազգային կինոփառատոնը՝ «Բարեկամների կինոն» խորագրի ներքո: Փառատոնի հիմնական նպատակն էր Հունաստանի և հունական համայնք ունեցող երկրների միջև բարեկամական հարաբերություններ ամրապնդելը, ինչպես նաև այդ երկրների կինեմատոգրաֆիստների ու կինոսիրողների համագործակցության զարգացմանը նպաստելը: Կինոփառատոնն անցկացվել է Հունաստանի մշակույթի նախարարության, Պիրեուսի և կղզիների ՅՈՒՆԵՍԿՕ-ի ակումբի, Պելոպոնեսի մարզպետարանի և Լուտրակիի քաղաքապետարանի հովանու ներքո:

Հայաստանից փառատոնին ներկայացվել է Արտակ Իգիթյանի և Վահան Ստեփանյանի «Վանա ծովուն արշալույսը» ֆիլմը /սցենարի հեղինակներ՝ Արմեն ու Արեն Վաթյաններ/: Այն պատմում է եղեռն ապրած և ԱՄՆ ներգաղթած Կարապետ Փամբուկչյանի մասին, ով ձգտում է ամերիկանացված իր ժառանգների մեջ արթնացնել ու ամրացնել կապը կորուսյալ Հայրենիքի հետ, որդուն ու թոռանը ամեն կերպ վերադարձնել ազգային արմատներին: Փառատոնի շրջանակներում հանդիսատեսին ֆիլմը ներկայացրել է Հունաստանում ՀՀ դեսպանության արտակարգ դեսպանորդ և լիազոր նախարար Մ. Մարտիկյանը: Հույն հանդիսատեսի կողմից ֆիլմն արժանացել է ջերմ ընդունելության: Փառատոնին մասնակցում էին նաև ֆիլմեր Ռուսաստանից, Ղազախստանից, Ուկրաինայից, Մոլդովայից և Ադրբեջանից: