Երկրներն ունեն սահման, ջրային ռեսուրսները չունեն․ պետք է համագործակցել․ Սիմինդյանը՝ ԳՄՀԸ անդամներին

Գերմանիան ԵՄ երկրների շարքում Հայաստանի լավագույն գործընկերն է շրջակա միջավայրի ոլորտում: Այս մասին այսօր՝ մարտի 28-ին, Գերմանական միջազգային համագործակցության ընկերության (ԳՄՀԸ/GIZ) «Արևելյան գործընկերության երկրներում դեկարբոնիզացման, կլիմայի դիմակայունության և էներգետիկ անվտանգության» բազմադոնոր ծրագրի գնահատման առաքելության ներկայացուցիչների հետ հանդիպման ժամանակ նշել է Շրջակա միջավայրի նախարար Հակոբ Սիմիդյանը:

ՇՄ նախարարությունից հայտնում են, որ ծրագիրը համատեղ ֆինանսավորվում է Եվրոպական միության (EU) և Գերմանիայի Դաշնային Հանրապետության շրջակա միջավայրի, բնության պահպանության, ատոմային անվտանգության և սպառողների պաշտպանության նախարարության (BMUV) կողմից։

Ողջունելով գործընկերներին Շրջակա միջավայրի նախարարությունում, նախարար Հակոբ Սիմիդյանը բարձր է գնահատել Գերմանիայի Դաշնային Հանրապետության հետ համագործակցությունը․

«Գերմանիայի Դաշնային Հանրապետությունը ԵՄ երկրների շարքում Հայաստանի լավագույն գործընկերն է շրջակա միջավայրի ոլորտում։ Մենք բարձր ենք գնահատում Գերմանիայի, տվյալ դեպքում Գերմանական միջազգային համագործակցության ընկերության (ԳՄՀԸ/GIZ) աջակցությունը Հայաստանում շրջակա միջավայրի վիճակի բարելավման և պահպանության օրակարգին»,-նշել է նախարարը։

ԵՄ գործողություն գնահատման առաքելություն ղեկավար Մարտինա Կոլբը շնորհակալություն է հատնել ընդունելության համար և կրկին պատրաստակամություն հայտնել աջակցել Հայաստանի Հանրապետությանը շրջակա միջավայրի ոլորտում առաջնահերթությունների շրջանակում․

«Պլանավորված բազմադոնոր ծրագրի նպատակն է աջակցել Արևելյան գործընկերության երկրներում կանաչ անցմանը, ուժեղացնել դեկարբոնիզացիա (ապաածխածնացումը) և բարձրացնել դիմակայունությունը կլիմայի փոփոխության հետևաքների նպատակով»,-նշել է տիկին Կոլբը։

Նախարարը գործընկերներին է ներկայացրել այն առաջնահերթությունները և դրանց միտված օրենսդրական բարեփոխումները, որոնք այս պահին գտնվում են նախարարության ուշադրության կենտրոնում։

Նախարարն անդրադարձել է ոլորտային ռազմավարությունների մշակման գործընթացին և դրա լիարժեք իրականացման հարցում աջակցության ակնկալիք հայտնել։

Անդրադառնալով Հայաստանում ԵՄ առաքելության համագործակցության ղեկավար Ֆրանկ Հեսսի դիտարկմանը ջրային ոլորտում տարածաշրջանի երկրների համագործակցության վերաբերյալ, նախարար Հակոբ Սիմիդյանը ևս մեկ անգամ վերահաստատել է Հայաստանի Հանրապետության միջազգային հանրության պատասխանատու և լիարժեք անդամ լինելու փաստը․

«Հայաստանի Հանրապետությունը որպես տարածաշրջանի երկիր, այդ թվում՝ տարածաշրջանային ծրագրերի լիարժեք անդամ իրեն պատասխանատու է համարում ոլորտում առաջընթացի գրանցման համար։ Տարածաշրջանում հնարավոր խաղաղ գոյակցությունը, այդ թվում՝ շրջակա միջավայրի ոլորտում, և մասնավորապես՝ ջրային ոլորտում համագործակցությունը մենք դիտարկում ենք կրկին միջազգային հանրության առջև մեր պատասխանատվության տեսանկյունից։ Երկրները ունեն սահմաններ, բայց ջրային ռեսուրսները չունեն դրանք, ուստի պետք է գտնել համագործակցության հնարավոր եզրերը և ջանքեր գործադրել այդ ուղղությամբ»։

Հանդիպման ավարտին նախարարը հաջողության է մաղթել առաքելության գործունեությանը և պատրաստակամություն հայտնել անել հնարավորը՝ ծրագրերի շարունակականության ապահովման և համատեղ նոր ծրագրերի իրականացման ուղղությամբ։