Հայկ Գալստյանին խոշտանգե՞լ են․ ՄԻՊ-ը արձագանքել է Վարդան Ղուկասյանի ահազանգին

ՄԻՊ աշխատակազմը երեկ ահազանգ է ստացել, որ «Հանրային ձայն» կուսակցության անդամ Արտակ Գալստյանի որդուն՝ Հայկ Գալստյանին, առևանգել են և, ահազանգողի տեղեկություններով, տարել են Երևան քաղաքի քննչական վարչություն։ Այս մասին ԼՈՒՐԵՐ.com-ի հետ զրույցում ասաց ՄԻՊ մամուլի խոսնակ Արթուր Ասլանյանը։

«ՄԻՊ աշխատակազմից կապ ենք հաստատել վարչության հետ, որտեղից հայտնել են, որ քննչական վարույթային գործողություններ իրականացնելու նպատակով Հայկ Գալստյանին բերման են ենթարկել և սպասում են փաստաբանին։ Այնուհետև աշխատակազմից կապ ենք հաստատել փաստաբան Հայկ Սարգսյանի հետ, ով տեղեկացրել է, որ այդ պահին ճանապարհին է գտնվում և գնում է քննչական վարչություն, իսկ ավելի ուշ տեղեկացրել է, որ խնդիրներ չկան»,- ասաց նա։

Հարցին՝ ՄԻՊ աշխատակազմը շարունակում է ուշադրության կենտրոնում պահել այս ահազանգը, քանի որ ըստ ահազանգի՝ Հայկ Գալստյանին խոշտանգել էին, Ասլանյանը պատասխանեց․ «Փաստաբանին խնդրել ենք, որպեսզի որևէ խնդիր ի հայտ գալու դեպքում կապ հաստատի ՄԻՊ աշխատակազմի հետ, սակայն մինչ այս պահը, կապ չի հաստատել»։

Հիշեցնենք, որ երեկ՝ մայիսի 2-ին, «Հանրային ձայն» կուսակցության հիմնադիր Վարդան Ղուկասյանը մեզ հետ զրույցում հայտնեց, որ Հայկ Գալստյանին առևանգել են և իր տեղեկություններով՝ խոշտանգել են։