ՀՀ-ն մեր հայրենիքն է, սակայն յուրաքանչյուր երկիր, բացի ֆիզիկական բնույթից,ունի նաև ոգեղեն հատկանիշներ․ իրանագետ

Այո՛, Հայաստանի Հանրապետությունը մեր հայրենիքն է, սակայն, ինչպես պրոֆեսոր Նիկողայոս Ադոնցն էր իրավամբ նշում, յուրաքանչյուր երկիր, բացի ֆիզիկական բնույթից, ունի նաև ոգեղեն հատկանիշներ։ Այս մասին գրում է իրանագետ Վարդան Ոսկանյանը։

«Հենց այս կարևորագույն հանգամանքը հաշվի առնելով՝ պետք է արձանագրել, որ Հայաստանի Հանրապետությունը մեր հայրենիքն է, բայց միայն՝ այդ հայրենիքի մի մասը, քանզի մենք՝ որպես միասնական ազգային կոնստրուկտ, չենք կարող հրաժարվել Տարոնի Հացեկաց գյուղից, որը ծնունդ է տվել մեր մեծագույն սրբին, չենք կարող հրաժարվել Արցախի Ամարասից, որտեղ բացվել է մեր առաջին դպրոցներից մեկը, չենք կարող հրաժարվել Գողթնից, որտեղ երգվել են մեր հեթանոս երգերը և նմանապես մեր հայրենիքի որևէ այլ սրբազան տարածքից։

Հայաստանը մեկ միասնական աշխարհագրական և քաղաքակրթական բնականոն օրգանիզմ է, որտեղ մեզ համար նույնքան սուրբ են, հարազատ ու պաշտելի և՛ Մասիսը, և՛ Արագածը, և՛ Սիփանը, և՛ Դիզափայտը»։