Օգտակար և արդյունավետ ենք համարում. Ադրբեջանը հայտարարություն է տարածել բրյուսելյան հանդիպման վերաբերյալ

«Բրյուսելյան ֆորմատով» հաջորդ հանդիպումը, որը դադարեցվել էր 9 ամիս առաջ տարբեր միջամտության փորձերի և պայմանների առաջադրման պատճառով, կարևոր է կողմերի միջև ամենաբարձր մակարդակով երկխոսությունը խրախուսելու տեսանկյունից։

Այս մասին հայտարարել է Ադրբեջանի ԱԳՆ-ն՝ մայիսի 14-ին Բրյուսելում Հայաստանի վարչապետ Նիկոլ Փաշինյանի, Ալիևի և Եվրոպական Միության խորհրդի նախագահ Շառլ Միշելի հանդիպման կապակցությամբ, հաղորդում է Trend-ը։

«Մայիսի 14-ին Ադրբեջանի նախագահի և Հայաստանի վարչապետի միջև այս ձևաչափով Եվրամիության խորհրդի նախագահի կողմից կազմակերպված հինգերորդ հանդիպումը օգտակար և արդյունավետ ենք համարում երկու երկրների հարաբերությունների կարգավորման օրակարգն առաջ մղելու առումով։ 

Կողմերի ամենաբարձր մակարդակով երկխոսությունը խրախուսելու տեսանկյունից առաջին հերթին կարևոր է «բրյուսելյան ձևաչափով» հաջորդ հանդիպումը, որը դադարեցվել էր 9 ամիս առաջ՝ տարբեր միջամտության փորձերի և պայմանների առաջադրման պատճառով։

Հանդիպման ընթացքում մտքերի հանգամանալից փոխանակում է տեղի ունեցել Ադրբեջանի և Հայաստանի միջև երկկողմ խաղաղ համաձայնագրի նախագծի համաձայնեցման, սահմանների սահմանազատման և հաղորդակցության վերականգնման ոլորտներում կոնկրետ արդյունքների հասնելու համար։

Հանդիպումը նաև հնարավորություն է ընձեռել քննարկելու հումանիտար հարցեր, որոնք կարևոր են հետհակամարտության կարգավորման տեսանկյունից։ Այս համատեքստում ևս մեկ անգամ ընդգծվում է հատկապես անհայտ կորածների ճակատագրի պարզաբանման և ականազերծման ոլորտում միջոցառումների արագացման կարևորությունը։

Մենք հայտարարում ենք, որ Ադրբեջանի և Հայաստանի միջև հարաբերությունների կարգավորումը՝ փոխադարձ ճանաչման և միմյանց ինքնիշխանության, տարածքային ամբողջականության և միջազգային սահմանների հարգման հիման վրա, միակ ճանապարհն է՝ ապահովելու կայուն խաղաղություն և կայունություն տարածաշրջանում։

Մենք ողջունում ենք ջանքերն այս ուղղությամբ՝ նպաստելու հարաբերությունների կարգավորման առաջընթացի ձեռքբերմանը, վերահաստատելով մեր պատրաստակամությունը՝ շարունակելու երկխոսությունն ու փոխգործակցությունը այդ նպատակը հետապնդող միջազգային գործընկերների հետ»,- ասված է հայտարարության մեջ։