Թմրամիջոցների անօրինական շրջանառությամբ զբաղվող խմբում գործել են նաև օտարերկրացիներ

Քրեական ոստիկանության թմրամիջոցների անօրինական շրջանառության դեմ պայքարի վարչության ծառայողները ստացել են օպերատիվ տեղեկություն, որ Երևանի 31-ամյա մի բնակիչ ձեռք է բերում առանձնապես խոշոր չափերի տարատեսակ թմրամիջոցներ և դրանք մաս-մաս իրացնում Երևանում:

Ինչպես տեղեկացրին ՀՀ ներքին գործերի նախարարության ոստիկանությունից, օպերատիվ տեղեկության իրացումը սկսվել է մայիսի 5-ին, երբ արդեն պարզվել է, թե ումից է 31-ամյա տղամարդը ձեռք բերում թմրանյութը: Ժամը 19.30-ին նա ձերբակալվել է Երևանի Վաղարշյան-Ավետիսյան փողոցների խաչմերուկում և, իր վարած մեքենայով հանդերձ, տեղափոխվել ոստիկանության Արաբկիրի բաժին:

«Արաբկիրի քննչական բաժնում նախաձեռնվեց քրեական վարույթ, իսկ մեքենայի խուզարկությամբ հայտնաբերվեց 10 գրամ մեթամֆետամին:

Հետագա միջոցառումներն իրականացվեցին Արաբկիրի ոստիկանների հետ: Հիմնավորվեց, որ 31-ամյա երևանցին թմրանյութը ձեռք է բերում Երևանում բնակվող 29-ամյա մի օտարերկրացուց, որն էլ իր հերթին այն ձեռք է բերում Երևանում բնակվող 39-ամյա համերկրացուց:

Մայիսի 8-ին, ժամը 19.30-ին, նրանք ձերբակալվեցին Կասյան փողոցում և, 39-ամյա օտարերկրացու վարած մեքենայով հանդերձ, տեղափոխվեցին Արաբկիրի բաժին:
Անձնական խուզարկությամբ ուղևորի մոտ հայտնաբերվեցին ընդհանուր 9 գրամ քաշով ութ փաթեթ մեթամֆետամին և պլաստիկ տարայով մարիխուանա: Մեքենայի խուզարկությամբ հայտնաբերվեց հոգեմետ 10 դեղահաբ»,- ասվում է հաղորդագրության մեջ:

Ըստ աղբյուրի՝ խուզարկություն է եղել նաև նրանց բնակարաններում: 39-ամյա տղամարդու տնից հայտնաբերվել է մոտ 16 գրամ մեթամֆետամին, նույնքան ափիոն և թմրամիջոց օգտագործելու գլանակներ:

«Երկուսն էլ կալանավորվել և տեղափոխվել են քրեակատարողական հիմնարկ:

Նախաքննությամբ հանգամանքները պարզվում են»,- հայտնում են ՀՀ ՆԳՆ ոստիկանությունից: