Glendale News Press. ԱՄՆ-ում խարդախության մեղադրանքով հայեր են ձերբակալվել

Glendale News Press-ը հաղորդում է, որ ԱՄՆ-ի 3 քաղաքների 5 հայազգի քաղաքացիներ են ձերբակալվել բանկային խոշոր խարդախություններ իրականացնելու մեղադրանքով: ԱՄՆ-ում Փասադանիայի հայազգի բնակիչ 33-ամյա Ասատուր Ասատրյանը, գլենդելաբնակ 30-ամյա Արա Հարությունյանը, 24-ամյա Արթուր Հարությունյանը, 59-ամյա Սերյոժա Հարությունյանն ու 53-ամյա Հիլդա Հախվերդյանը հայտնվել են այն 14 մեղադրյալների ցուցակում, ովքեր դատարանի առջև են կանգնել բանկային խարդախություններ իրականացնելու մեղադրանքով: Համաձայն Սան Դիեգոյի շրջանային դատախազի հայտարարության՝ նրանք մեղադրվում են «Առևանգել 60 վայրկյանում» ծածկանվան տակ գործող բանկային խարդախության մեջ, որի արդյունքում ավելի քան 1 մլն. դոլար են գողացել ամերիկյան Citibank-ից:

Խարդախության պլանի հեղինակն է 29-ամյա Արա Քեշիշյանը Ֆիլմորից, ով համախոհներ է հավաքել և Citibank-ում նրանց անուններով հաշիվներ բացել:

Քեշիշյանը նրանցից յուրաքանչյուրին 9-10 հազար դոլարի չափ գումար է տվել, որն էլ դրվել է նրանց հաշվեհամարներին. հաղորդում է մեղադրական կողմը: Գումարը բանկին պահ տալուց հետո հանցագործներն ուղևորվել են Հարավային Կալիֆորնիայի և Նևադայի խաղատները և բանկային քարտի միջոցով կանխիկ գումարներ հանել խաղային ապարատներից: Այդ կանխիկացումները կատարվել են 60 վրկ. ընթացքում:
Համաձայն  ԱՄՆ-ի Սան Դիեգոյի շրջանային դատարանի հայտարարության՝ հանցագործներին սպառնում է 5 տարվա ազատազրկում և 250 հազար դոլարի չափով տուգանք:

Մեղադրվող կողմի դատավարությունը տեղի է ունենալու եկող շաբաթ: