Ինտերնետային վիրուսը կարող է գտնել գաղտնաբառերը

«Համակարգչային անվտանգության գիտելիքների տիրապետումը Հայաստանում շատ ցածր մակարդակի վրա է գտնվում։ Շատերը պարզապես չեն էլ պատկերացնում, որ անհրաժեշտ է օգտագործել հակավիրուսային ծրագրեր, չեն էլ պատկերացնում, որ հարկավոր է ունենալ լիցենզիոն windows համակարգ, windows-ն ինքն իրեն միշտ թարմացնում է, անհրաժեշտ է օգտագործել լինցեզավորված օպերացիոն համակարգեր»։

Այս մասին լրագրողների հետ հանդիպմանն ասաց Հայաստանի Ինտերնետ հանրություն ՀԿ փոխնախագահ Գրիգորի Սաղյանը։ 

Անդրադառնալով այսօր մեր համակարգիչներում տարածված վիրուսներին՝ վերջինս նկատում է, որ նախկինում եղած վիրուսների համամատ կան էական տարբերություններ։

«Այսօրվա վիրուսներն առաջվանը չեն, առաջվա վիրուսները վնաս էին տալիս մարդկանց։ Շատ դեպքերում մտնում էին համակարգիչ և ջնջում էին համակարգչի տեղեկատվությունը, այսօրվա վիրուսները նման գործառույթ չունեն։ Այսօր դրանք ունեն երկու կարևոր գործառույթ, որոնք գումարային շահ են հետապնդում, առաջինը՝ դրանք հավաքում են ձեր մասին տեղեկատվություն, որը դուք պահպանում եք ձեր համակարգչի մեջ։ Շատերս, մեր գաղտնաբառը պահպանելով  windows-ի մեջ, ամեն անգամ չենք հավաքում, այդ դեպքում վիրուսը գտնում է քո գաղտնաբառը և ուղարկում համապատասխան կենտրոն. այդ կերպ հավաքում են գաղտնաբառերի բազան։ Երկրորդը՝ ապահովում են Ddos գրոհներ, որը շատ ծանր երևույթ է. օրինակ եթե մենք ունենք մեկ միլիոն վարակված համակարգիչ, վարակողը մի տհաճ րոպեի կարող է տալ հրահանգ, որի արդյունքում այդ մեկ միլինոն վարակված համակարգիչները կսկսեն հարցումներ իրականացնել մեկ կայքից։ Կայքը, բնականաբար, չի հասցնում պատասխանել և դառնում է անհասանելի»,- ասաց Գրիգորի Սաղյանը և հավելեց, որ այդ գրոհների դեմ պայքարելը շատ դժվար է, այն էլ՝ Հայաստանի նման երկրում, որի ընդհանուր միացումն ինտերնետի հետ կազմում է 40 GB/վայրկյան։

Բանախոսը նկատում է նաև, որ այսօր հայկական կայքերի նկատմամբ հետևողականությունը թույլ է. «ուսանողը սարքում ու գնում է, միշտ անհրաժեշտ է կայքին հետևել»,-ասաց վերջինս։