Եզրափակվեց ««Կինոաշուն - 2012» ազգային կինոյի ամիս» ծրագիրը

Վերջին լուրեր 1 Նոյեմբեր, 2012 0:36

Հոկտեմբերի 30-ին «Նաիրի» կինոթատրոնում եզրափակվեց «Կինոաշուն-2012» ազգային կինոյի ամիս» ծրագիրը, եւ ամփոփվեց ծրագրի շրջանակներում հայտարարված արդեն ավանդական դարձած գրախոսականների մրցույթի արդյունքները: Մեկ ամիս շարունակ մայրաքաղաքի ու մարզերի կինոսիրող հանդիսատեսը հնարավորություն ունեցավ դիտելու հին ու նոր, հարազատ ու անմոռանալի ազգային կինոնկարներ:

Հայաստանի ազգային կինոկենտրոնի տնօրեն Գեւորգ Գեւորգյանի խոսքերով, թեեւ, «Կինոաշունը» պաշտոնապես փակվեց, սակայն որոշ մարզերում, բնակչության խնդրանքով, այն երկարձգվել է մինչեւ նոյեմբերի 5-ը՝ ավելացված կինոցուցադրումների համար: Ծրագրի ղեկավարը հավաստիացրեց, որ արդեն ավանդական եւ սպասված այս կինոտոնը հաջորդ տարի կինոդիտումներ եւ հանդիպումներ կկազմակերպի նաեւ Արցախում: Բացի այդ, «Կինոաշուն-2013-ը» կներկայանա նոր բաղադրիչով, ֆիլմացանկերում կընդգրկվեն սփյուռքահայ կինոռեժիսորների աշխատանքները:

Ազգային կինոտոնի մեկ ամսյակը եւս մեկ անգամ հնարավորություն ընձեռեց մեծարելու եւ հիշելու հայ կինոյի երախտավորների հոբելյանները: Կինոտոնն այս տարի նվիրվել էր հայ կինոյի հիմնդիր Համո Բեկնազարյանի 120-ամյակին, ինչի առթիվ կազմակերպվեց վարպետի հայտնի եւ անհայտ ֆիլմերի հետահայաց ցուցադրությունը, իսկ Երեւանի թատրոնի եւ կինոյի պետական ինստիտուտում կազմակերպվեց գիտաժողով' «Բեկնազարովը եւ ժամանակը» խորագրով:

«Կինոաշուն» ազգային կինոյի ամիս» ծրագրի շրջանակներում հայտարարված գրախոսակականների մրցույթի արդյունքներն հայտարարեց մրցութային հանձնաժողովի նախագահ՝ Երեւանի թատրոնի եւ կինոյի պետական ինստիտուտի, Կինոյի, հեռուստատեսության եւ անիմացիայի ֆակուլտետի դեկան, պրոֆեսոր, արվեստի վաստակավոր գործիչ Անիտա Երզնկյանը: Նա նշեց, որ տարեցտարի մասնակիցների թիվը աճում է, իսկ աճի հետ գրանցվում է նաեւ որակական առաջընթաց: Ընդհանուր առմամբ, գրախոսականների մրցույթին այս տարի մասնակցել են արվեստիր բուհերի 45 ուսանող, 1 կինոքննադատ եւ 1 թատերագետ, կինոլրագրող:

Հաղթողները արժանացան դիպլոմների եւ դրամական պարգեւների:

Նշենք, որ նախորդ տարիների համեմատ մասնակիցների թիվը աճել է՝ համապատասխանաբար 17, 33 եւ այս տարի արդեն 47:

Հիշեցնեք, որ «Կինոաշուն» ծրագրի նորություններն ու ֆիլմերի ցանկը ամեն օր թարմացվել է Facebook-ի Կինոաշուն եւ Ազգային կինոկենտրոնի էջերում, եւ միաժամանակ դրանցում տեղ գտած տեղակտվությունը իր հերթին տարածվել է գրեթ 60 հազար օգտատեր ունեցող «ԱՐՄԵՆԻԱ» էջում: Ազգային կինոյի ամիս ծրագիրը լայնորեն լուսաբանվել է հայկական ԶԼՄ-ների կողմից: