ՀՀ վարկային ներդրումների ծավալներն ավելացել են 33.6%-ով. ԿԲ

2011թ.-ի հունիսից մինչև 2012թ.-ի հունիսն ընկած ժամանակահատվածում ՀՀ բանկային համակարգի վարկային ներդրումների ծավալն ավելացել է 33.6%-ով և կազմել 1 տրլն 488 մլրդ դրամ:

Վարկային ներդրումների աճ գրանցվել է բոլոր մարզերում: Աճի տեմպն առավել բարձր է եղել Արմավիրի, Տավուշի և Վայոց ձորի մարզերում` համապատասխանաբար 121.4%, 91.0% և 83.9%:

Հաշվետու ժամանակահատվածում Երևանում վարկային ներդրումներն ավելացել են 27.8%-ով (204.5 մլրդ դրամով), իսկ ՀՀ մնացած մարզերում և ԼՂՀ-ում համընդհանուր վարկային ներդրումներն ավելացել են 45.0%-ով (169.9 մլրդ դրամով), ինչի արդյունքում ընդհանուր վարկային ներդրումներում 2.9 տոկոսային կետով նվազել է Երևանին հատկացված վարկերի տեսակարար կշիռը՝ կազմելով 63.2%:

2000-2012 թթ. ժամանակաշրջանում վարկային ներդրումներում Երևանի մասնաբաժինը հիմնականում տատանվել է 65-70%-ի շրջանակներում:

Նախորդ տարվա հունիսից մինչև այս տարվա հունիսն ընկած ժամանակահատվածում բանկային համակարգում ակտիվների քանակն ավելացել է 6.8%-ով: Նշված ժամանակահատվածում Երևանին բաժին ընկնող ակտիվների տեսակարար կշիռն աճել է 2.7 տոկոսային կետով և այս տարվա հունիսի դրությամբ կազմել 40.5%:

Երևանում վարկերի աճը հիմնականում պայմանավորված է առևտրի, սպառողական և արդյունաբերության (հիմնականում` շինանյութերի) ոլորտների վարկավորման աճով: Վերոնշյալ ճյուղերի վարկավորումն ավելացել է համապատասխանաբար 47.6%-ով (կամ 83.7 մլրդ դրամով), 37.1%-ով (կամ 37.6 մլրդ դրամով) և 28.7%-ով (կամ 40.8 մլրդ դրամով):

ՀՀ մյուս 10 մարզերում և ԼՂՀ-ում վարկերի աճը հիմնականում պայմանավորված է արդյունաբերության (հիմնականում՝ հանքագործական), սպառողական և առևտրի ճյուղերին տրամադրված վարկերի աճով: Նշված ճյուղերի վարկավորումը (առանց Երևանի) աճել է համապատասխանաբար 86.2%-ով (կամ 75.3 մլրդ դրամով), 42.4%-ով (կամ 36.7 մլրդ դրամով) և 39.0%-ով (կամ 19.0 մլրդ դրամով):

ՀՀ գրեթե բոլոր մարզերում (բացառությամբ՝ Արագածոտնի և Շիրակի), և ԼՂՀ-ում գրանցվել է արդյունաբերության վարկավորման աճ:
Արդյունաբերության ճյուղի համեմատաբար խոշոր աճ է արձանագրվել Արմավիրի (46.6 մլրդ դրամով), Արարատի (7.5 մլրդ դրամով) և Տավուշի մարզերում (6.9 մլրդ դրամով):
Հաշվետու ժամանակահատվածում.

• Արդյունաբերության վարկերն ավելացել են ՀՀ գրեթե բոլոր մարզերում և ԼՂՀ-ում` բացառությամբ Արագածոտնի և Շիրակի մարզերի,

• Գյուղատնտեսության վարկերն ավելացել են ՀՀ գրեթե բոլոր մարզերում և ԼՂՀ-ում` բացառությամբ Կոտայքի մարզի,

• Առևտրի վարկերն ավելացել են ՀՀ գրեթե բոլոր մարզերում և ԼՂՀ-ում` բացառությամբ Տավուշի և Սյունիքի մարզերի,

• Սպառողական վարկերն ավելացել են ՀՀ բոլոր մարզերում և ԼՂՀ-ում,
• Հիփոթեքային վարկերն ավելացել են ՀՀ բոլոր մարզերում և ԼՂՀ-ում:

Ըստ տնտեսության ճյուղային բաշխվածության՝ հաշվետու տարում ընդհանուր վարկային ներդրումներում 2.6 և 1.8 տոկոսային կետով ավելացել են արդյունաբերության ճյուղի և առևտրի տեսակարար կշիռները: Փոխարենը նվազել են ֆինանսական հատվածի և շինարարության վարկերի տեսակարար կշիռները՝ համապատասխանաբար 1.8 և 1.0 տոկոսային կետերով:

Ընդհանուր վարկերի բաշխվածությունը տնտեսության ճյուղերում ըստ մարզերի բևեռացված բնույթ ունի և կենտրոնացված է Երևանում (բացառությամբ՝ գյուղատնտեսության ճյուղի. Երևանին բաժին է ընկնում գյուղատնտեսության ընդհանուր վարկերի 13%-ը:

Գյուղատնտեսության ճյուղին տրամադրված վարկերում ամենամեծ տեսակարար կշիռն ունեն Արմավիրի մարզը` 17.3%, Արարատի մարզը` 13.9% և Կոտայքի մարզը` 11.8% (30.06.2011 թ. դրությամբ` համապատասխանաբար 20.2%, 16.4% և 18.7%), իսկ ամենափոքր տեսակարար կշիռը՝ Գեղարքունիքի մարզը` 3.3%, Սյունիքի մարզը` 3.5 և Տավուշի մարզը` 2.4% (30.06.2011 թ.՝ համապատասխանաբար 4.2%, 3.8% և 2.3%):

Վարկային ներդրումների ճյուղային բաշխվածության տեսանկյունից՝ ՀՀ մարզերում (բացառությամբ` Երևանի) և ԼՂՀ-ում վարկային պորտֆելը չափավոր կենտրոնացված է. ըստ տնտեսության ճյուղերի վարկավորման՝ Հերֆինդալ-Հիրշմանի ինդեքսը նախորդ տարվա համեմատ նվազել է 0.01 կետով և հաշվետու ժամանակահատվածում կազմել 0.118: Նույն ցուցանիշի միջին մեծությունը ըստ ՀՀ մարզերի (բացառությամբ` Երևանի) և ԼՂՀ-ի կազմել է 0.171` վկայելով որոշ մարզերում վարկավորման ճյուղային համեմատաբար բարձր կենտրոնացվածության մասին:

Վարկային ներդրումների ժամկետայնության առումով՝ հաշվետու տարում 1 տարի և ավելի մարման ժամկետայնությամբ վարկերի տեսակարար կշիռն աճել է 2.8 տոկոսային կետով և կազմել 79%: 30.06.12 թ. դրությամբ ՀՀ բոլոր մարզերում և ԼՂՀ-ում 1 տարի և ավելի մարման ժամկետայնությամբ վարկերի ծավալները գերազանցել են կարճաժամկետ վարկերի ծավալները:

Հաշվետու տարվա ընթացքում վարկային ներդրումների կառուցվածքում արտարժութային վարկերի տեսակարար կշիռն աճել է 6.6 տոկոսային կետով և այս տարվա հունիսի դրությամբ կազմել ընդհանուր վարկերի 64.5%-ը:

ՀՀ մարզերի մեծ մասում (Արագածոտնի, Շիրակի, Տավուշի, Գեղարքունիքի, Վայոց ձորի, Սյունիքի) դրամային վարկերի տեսակարար կշիռը գերազանցել է արտարժութային վարկերի տեսակարար կշիռը:

Միջազգային վարկային ծրագրերով տրամադրված վարկերը Երևանում ավելացել են 54.6%-ով և հաշվետու տարվա վերջին կազմել 147.5 մլրդ դրամ, ՀՀ մարզերում և ԼՂՀ-ում՝ 49.6%-ով և 2012թ.-ի հունիսի դրությամբ կազմել 116.6 մլրդ դրամ, ընդ որում՝ ՀՀ բոլոր մարզերում գրանցվել է միջազգային վարկային ծրագրերով տրամադրված վարկերի աճ: Արդյունքում, նախորդ տարվա համեմատ, Երևանի մասնաբաժինը միջազգային վարկային ծրագրերի շրջանակներում տրամադրված միջոցներում աճել է 0.8 տոկոսային կետով և այս տարվա հունիսի դրությամբ կազմել 55.8%:

Մարզերին տրամադրված ընդհանուր վարկերում միջազգային վարկային ծրագրերի շրջանակներում տրամադրված միջոցների տեսակարար կշիռը նախորդ տարվա համեմատ աճել է 0.6 տոկոսային կետով և կազմել 21.3%, ինչը վկայում է ՀՀ մարզերի համար միջազգային ծրագրերի շրջանակներում իրականացվող վարկավորման կարևորության մասին:

Ինչպես երևում է գծապատկեր 10-ից, ՀՀ մարզերում և ԼՂՀ-ում ժամկետանց վարկերի տեսակարար կշիռը համեմատաբար բարձր է Կոտայքի (4.7%), Արարատի (1.4%), Լոռու (1.1%) մարզերում և Երևանում (1.6%):