Րաֆֆի Հովհաննիսյանը Սերժ Սարգսյանի՝ միակ «անայլընտրանք» լինելու մասին

Ստորև ներկայացնում ենք «Ժառնագություն» կուսակցության առաջնորդ Րաֆֆի Հովհաննիսյանի խոսքը Սերժ Սարգսյանի' միակ «անայլընտրանք» լինելու մասին:

«Այսօր Հովիկ Աբրահամյանը, ով պատիվ էր արել գործող նախագահի փոխարեն իմ նամակին վերջապես, թեկուզ հռետորաբար, պատասխանել, հայտարարեց, թե պարոն Սարգսյանը չունի մրցունակ այլընտրանք:

Նրա այդ ցանկությունն ինքնին մատնում է, որ այս իշխանություններն իրենց նախորդների նման տապալվել են: Ցանկացած պետություն եւ իշխանություն պիտի ունենան այլընտրանք' երկրի ու նրա քաղաքացիների գերակա շահից ելնելով:

Իհարկե' եթե իշխող կուսակցապետերն ու շտաբի պետերը նախորդների օրինակով առաջիկա ընտրությունները «վարեն» իրենց հակասահմանադրական մեղսագործություններով' մեծ փողեր, նյութական այլ արժեքներ բաժանելով' որպես կաշառք, համայնքապետերին ստիպելով ու սպառնալով, հարյուրավոր պետական շենքեր օգտագործելով նեղ կուսակցական նպատակների համար, շահագործելով մեր դպրոցների, հիվանդանոցների, հանրային այլ հաստատությունների աշխատակազմերին (անգամ' աշակերտներին եւ ուսանողներին), մեր հպարտության ակունք հանդիսացող զինվորներին' սովորական մյուս իրավախախտ խմբերի հանգույն, ուղարկելով դեպի պարտադիր ու բազմակի քվեարկության եւ այլն, ապա, իհարկե, գործող անայլընտրանքը «լուրջ» մրցակից չի ունենա:

Իրապես ազատ եւ արդար ընտրության դեպքում, սակայն, իրականությունն այլ կլինի. Հայաստանը կունենա ժողովրդին պատկանող մրցակիցներ, կունենա ե´ւ նոր նախագահ, ե´ւ արժանապատիվ քաղաքացի, ե´ւ ամուր պետություն ու շենշող ապագա:

Թող սեփական մեղքերը չթաքցնեն: Իսկ եթե չեն վախենում իսկական մրցակցությունից' համապատասխան քայլեր անելու պահը հիմա է:

Մեր հայրենիքի վաղվա օրը մեր ժողովրդի ձեռքում է եւ նրա կամքի մեջ: Մենք, ի վերջո, ուզո՞ւմ ենք մեր խոսքն ու գործը մեկ անել:

Ուրիշ տեղ չնայենք:

Րաֆֆի Կ. Հովհաննիսյան