Մանրամասներ Հարսնաքարի գործից. Տուժող

Այսօր տեղի ունեցավ Հարսնաքարի գործով հերթական դատական նիստը: Նիստի սկզբում տուժող կողմի փաստաբանները միջնորդություն ներկայացրին դահլիճում ներկա որոշ անձանց կարգի հրավիրելու վերաբերյալ, ինչը բավարարվեց դատարանի կողմից:

Այնուհետև սկսվեց տուժողների հարցաքննությունը: Տուժողների հարցաքննությունը սկսվեց մեղադրող և տուժող կեղմի առաջարկած տարբերակով: Առաջինը տուժող Արտակ Բայադյանի հարցաքննությունn էր:

Պաշտպանվող կողմի փաստաբանները իրենց «անհանգստությունը» հայտնեցին Բայադյանի նստած դիրքի վերաբերյալ. «Արտակ Բայադյանը նստած է իր ներկայացուցչի կողքին, և ներկայացուցիչը կարող է հուշել նրան»,-այսպիսի մեկնաբանություն էին տալիս պաշտպանվող կողմի ներկայացուցիչները: Սակայն դատավոր Դավիթ Հարությունյանը նշեց, որ դա խնդիր չէ, և չի կարող պատճառ դառնալ Արտակ Բայադյանին տեղափոխելու համար:

Արտակ Բայադյանը մանրամասն ներկայացրեց դեպքը, նշելով, որ Հարսնաքար ռեստորանային համալիր են եկել երեկոյան կողմ՝ նպատակ ունենալով երաժշտության ուղեկցությամբ շարունակել Արզնու ձորում ավելի վաղ սկսված իրենց ուրախությունը: Նա նշում է, որ Հարսնաքար ռեստորանային համալիրի երգիչներից մեկը ծանոթ է եղել, ում էլ զանգահարելով խնդրել են սեղան պատվիրել: Ռեստորանում իրենց դիմավորել է հենց ծանոթ երգիչն ու իրենց ուղեկցել են պատվիրված սեղանի մոտ: Այնուհետև որոշ բաներ պատվիրելուց հետո Վահե Ավետյանը գնացել է լվացվելու, որտեղից վերադարձել է տրամադրության մի փոքր անկմամբ, նշելով, որ իրեն արգելում են սպորտային համազգեստով ներկա գտնվել ռեստորանում: Այնուհետև հաշիվը փակելով ցանկացել են գնալ մեկ այլ տեղ, սակայն Վահե Ավետյանն առաջարկել է մնալ այդտեղ, ասելով, որ ինքը կփոխի համազգեստն ու կվերադառնա: Փոխելով համազգեստը՝ Վահե Ավետյանը որոշ ժամանակ անց վերադարձել է, և նրանք շարունակել են երեկոն: Որոշ ժամանակ անց սեղանին մոտեցել է մատուցողը, ում Վահե Ավետյանը հարցրել է, թե՝ կարո՞ղ է՝ գլխարկով էլ չի կարելի, ինչին ի պատասխան՝ մատուցողն ասել է. ««կայֆավատ» ես լինում»: Վահե Ավետյանը պատասխանել է, որ՝ ոչ, ուղղակի հարցնում է։ Դրան ի պատասխան՝ մատուցողը ասել է՝ դուրս արի, կասենք: Վահեն և տուժողներից ևս մեկը դուրս են եկել: Մոտ 10 րոպե անց նրանց հետևից գնացել են Արտակ Բայադյանն ու մյուս տուժողները:

Դուրս գալով՝ տեսել են Վահե Ավետյանին ծնկաչոք և քթից բռնած: Որոշ անձանց կողմից նրանց հորդորել են հեռանալ այդ տարածքից, քանի որ այլ անձինք էլ են իրենց հանգիստը անցկացնում այդ պահին ռեստորանում, և որ իրենք կպատժեն մատուցողին իր այդ արարքի համար: Դրանից հետո քայլել են դեպի ավտոկայանատեղի: Ընթացքում անընդհատ Արտակ Բայադյանին հարցրել են, թե ով է հայհոյել, ինչին ի պատասխան՝ նա ասել է, որ հայհոյանք չի եղել: Ավտոկայանատեղիում, երբ լվացվելուց և քթի արնահոսությունը դադարեցնելուց հետո իրենց է միացել Վահե Ավետյանը, ըստ էության, առանց որևէ խոսակցության սկսել են հարվածել իրենց: Արտակ Բայադյանը նշում է, որ ծեծողները առնվազն եղել են 15-20 հոգի: Այդ ամբողջ ընթացքում եղել են միայն հարվածներ ու հայհոյանքներ: Ամեն ինչ ավարտվել է այն ժամանակ, երբ հնչել է «Էս մեկը մեռավ, հերիք ա» արտահայտությունը: Ուշքի գալով՝ Արտակ Բայադյանն ու մյուս ընկերները տեսել են Վահե Ավետյանին անելանելի վիճակում: Անմիջապես նրան տեղափոխել են Մուրացանի հոսպիտալ, որտեղ էլ որոշ ժամանակ անց նա մահացել է:

Արտակ Բայադյանին իրենց հարցերն ուղղեցին նաև մեղադրող կողմն ու տուժեղ կողմի փաստաբանները: Ներկայումս իրենց հարցերն են ուղղում պաշտպանվող կողմի փաստաբանները, որոնք, ըստ էության, կրում են խճճող և պրովոկատիվ բնույթ:

Դատական նիստը շարունակվում է: