Արցախի 120 հազար հայերը՝ վտանգի առաջ․ Ադրբեջանը մերժել է անվտանգության երաշխիքներ տալ

«Արցախը կանգնելու է էթնիկ զտումների առաջ, որովհետև Ալիևը շատ բացեյբաց ասել է` Արցախ ոչ ոք չի մտնելու և մենք ենք որոշելու՝ ով է այնտեղ ապրելու»,- այս մասին ԼՈՒՐԵՐ.com-ի հետ զրույցում ասաց ադրբեջանագետ Արմինե Ադիբեկյանը` անդրադառնալով Ադրբեջանի արտգործնախարար Ջեյհուն Բայրամովի արած հայտարարությանը։

Խոսքը Reuters-ի հրապարակման մասին է, որտեղ ասվում է, որ Ադրբեջանի արտգործնախարար Ջեյհուն Բայրամովը մերժել է Արցախում բնակվող շուրջ 120 հազար էթնիկ հայերի համար անվտանգության հատուկ երաշխիքներ տրամադրելու Հայաստանի պահանջը:

Վերջինս հայտարարել է, որ Նիկոլ Փաշինյանի՝ վերը նշված պահանջը «միջամտություն է Ադրբեջանի գործերին»։

«Երբ Փաշինյանը Արցախը ճանաչում էր Ադրբեջանի մաս, դա նշանակում էր, որ նա Ադրբեջանին տրամադրում է խաղաթուղթ` ինչ ուզում ես արա այդ 120 հազար հայի հետ, և մնացած բոլոր բանավոր խոսքերը, իհարկե, ոչ մի ուժ չունեն»,-ասաց Ադիբեկյանը։

Ըստ նրա՝ Արցախյան երկու պատերազմների մասնակիցները ենթարկվելու են պատժի,  այսինքն՝ Արցախում բնակվող բոլոր տղամարդիկ` 18-80 տարեկան, ենթարկվելու են ռեպրեսիաների, լավագույն դեպքում՝ նրանք կվտարվեն Արցախից, վատագույնը՝ նրանք կբանտարկվեն կամ կխոշտանգվեն և կմատնվեն մահվան։

«Մենք ունենք Եվրոպական դատարանի որոշում, երեկ ԵԽԽՎ-ն բանաձև է ընդունել, բայց Ադրբեջանին բացարձակապես չի հետաքրքրում, որովհետև այդ նույն պետությունները, կառույցները, Ադրբեջանի հետ վարում են բիզնես` գազի և նավթի առքուվաճառք են անում։ Այս ամենի ֆոնին մենք ունենք թույլ, ոչ մի քաշ չունեցող մարդկանց բանավոր խոսք, ինչ-որ թղթային տեսքով հորդորներ և պահանջներ, իսկ մյուս նժարի վրա մենք ունենք միլիարդավոր ներդրումներ օկուպացված տարածքներում և փող աշխատելու աղբյուր, և բնական է, որ երկրորդը ավելի շահեկան կարգավիճակում է և ավելի մեծ հաջողություններ կբերի, քան Փաշինյանի մեղանչանքները և բանավոր խոսքը»,-ասաց նա։

Մեր զրուցակիցը տեսակետ հայտնեց, թե Հայաստանը այստեղ անելիք այլևս չունի․ Հայաստանը ինքն է իր իրավունքը զրոյացրել, իսկ Ադրբեջանի վրա կարող ենք ազդել հետևյալ մեխանիզմներով․

«Առաջինը՝ Փաշինյանին ձերբակալել և բանտարկել, երկրորդը՝ նոր պատերազմ և հաղթանակ»,-եզրափակեց նա:

Հիշեցնենք, որ Ադրբեջանի արտգործնախարար Ջեյհուն Բայրամովը մերժել է Արցախում բնակվող շուրջ 120 հազար էթնիկ հայերի համար անվտանգության հատուկ երաշխիքներ տրամադրելու Հայաստանի պահանջը։

«Սա մեր խնդիրն է, և նման միջամտություն մեր ներքին գործերին մենք չենք ընդունում: Ադրբեջանն անոմ է ամեն ինչ, որպեսզի երաշխավորվեն այդ բնակչության իրավունքները»,- ասել է Բայրամովը։