Արդյունքներն ամփոփվում են, հետագա անելիքները՝ նախանշվում

Այսօր ՀՀ ԱԻ նախարար Արմեն Երիցյանն ընդունել է Ճապոնիայի միջազգային համագործակցության գործակալության (ՃՄՀԳ, JICA) Ուզբեկստանի տարածաշրջանային գրասենյակի ղեկավար Յուկիհիկո Էջիրին։ Հանդիպմանը ներկա էին նաև Ուզբեկստանի գրասենյակի Կովկասի համակարգող Օկի Սուգիմոտոն և Հայաստանյան գրասենյակի ծրագրի համակարգող Ռուզան Խոջիկյանը:

Այցի հիմնական նպատակն էր ամփոփել մինչ հիմա ՀՀ ԱԻՆ և Ճապոնիայի միջազգային համագործակցության գործակալության համագործակցության արդյունքները և նախանշել հետագա անելիքները:

Ողջունելով ճապոնացի հյուրերին՝ ԱԻ նախարար Ա. Երիցյանը շնորհակալություն հայտնեց արդյունավետ համագործակցության համար. «Ձեր տրամադրած հրշեջ մեքենաներով մենք անգամ օգնության ձեռք ենք մեկնել Ռուսաստանին։ Սեյսմիկ պաշտպանության ոլորտում ևս ահռելի աշխատանք է արված, և մենք փորձում ենք բոլոր ուղղություններով գնալ առաջ։ Շուտով պատրաստ կլինի մեր նորակառույց մասնաշենքը, ՀՀ կառավարության որոշմամբ մեզ է հանձնվել Գառնիի դիտարանը, որը վերանորոգումից հետո կդառնա տարածաշրջանային գիտական կենտրոն ու կծառայի ոչ միայն մեզ, այլև՝ մյուս երկրներին։ Ճապոնիա կատարած այցի ժամանակ ես իմ ելույթում առաջարկել եմ ստեղծել տվյալների փոխանակման միասնական դաշտ, որից կարող են օգտվել բոլորը»։

ՃՄՀԳ Ուզբեկստանի տարածաշրջանային գրասենյակի ղեկավար Յուկիհիկո Էջիրին նշեց, որ գտնվելով Հայաստանում մեծ ցանկություն ուներ հանդիպել ԱԻ նախարարին և շնորհակալություն հայտնեց ընդունելության համար. «Երկու շաբաթ առաջ մեր թիմը վերջին զեկույցը ներկայացրեց Հայաստանում սեյսմիկ ռիսկի գնահատման ծրագրի վերաբերյալ, որի ավարտին լուրջ, դրական արդյունքներ են արձանագրվել։ Կուզենայի ընդգծել, որ դրանում մեծ է նաև ԱԻ նախարարության ներդրումը, քանի որ առանց ձեր օժանդակության ծրագիրը սահուն չէր ընթանա։ Սովորաբար մարդիկ նման ծրագրերի կարևորությունը գիտակցում են միայն աղետից հետո, իսկ Հայաստանում մենք ակատես եղանք հակառակ պատկերին»։

Պարոն Էջիրին հավելեց նաև, որ իրենք կանեն ամեն հնարավորը, որպեսզի համագործակցությունը ՀՀ ԱԻ նախարարության հետ շարունակական լինի՝ ընդգծելով, որ նախանշվող ծրագրերում, որոնք հիմնականում կապված են սողանքների կանխարգելման հետ, ԱԻ նախարարությունը լինելու է ճապոնական գործակալության հիմնական գործընկերը։