«Գթության խոհանոց» ծրագիրը շարունակվում է

Այսօր «Հուսո տուն» բարեգործական կենտրոնում տեղի ունեցավ «Գթության խոհանոց» ծրագրի 19-րդ շրջանի բացման հանդիսավոր արարողությունը՝ հայ ժողովրդի մեծ բարեկամ քահանա Կառլ-Հայնց Շայդեի գլխավորությամբ:

«Գթության խոհանոց» ծրագիրը ֆինանսավորվում է Գերմանական Կարմիր Խաչի կողմից։ Արդեն 19 տարի այդ ծրագրի շրջանակներում Քանաքեռ-Զեյթուն վարչական շրջանի և հարակից շրջանների շուրջ 320 տարեց, միայնակ և սոցիալապես անապահով մարդիկ օրական մեկ անգամ տաք և կալորիապես հագեցած սնունդ են ստանում, ինչպես նաև օգտվում այդ հարկի ներքո գործող սոցիալական այլ ծառայություններից: Կարիքավորներին ցուցաբերվող սոցիալական օժանդակության տարեցտարի ընդլայնվող ծառայությունների ոլորտն ընդգրկում է տարբեր տարիքային և ռիսկային շահառուներ, իսկ ծայրահեղ կարիքավոր շահառուների համար «Հուսո տանը» գործում է լվացքատուն և լողասենյակ:

Բացման արարողությանը ներկա էին ՀՀ-ում Գերմանիայի Դաշնային Հանրապետության արտակարգ և լիազոր դեսպան Ռայմեր Մորելը, Կարմիր Խաչի միջազգային կազմակերպության ղեկավար Լորենցո Քարաֆին, Հայկական Կարմիր Խաչի նախագահ Մխիթար Մնացականյանը, ԱՌՆԱՊ-ի տնօրեն Մովսես Պողոսյանը, ՀՀ ԱԻՆ ՓԾ տնօրենի տեղակալ Նիկոլայ Գրիգորյանը, Սոցիալական ապահովության փոխնախարար Ջեմմա Բաղդասարյանը, Քանաքեռ-Զեյթուն վարչական շրջանի ղեկավար Գևորգ Ղազարյանը, պատգամավոր Արթուր Ստեփանյանը, քաղաքապետարանի և մի շարք հասարակական կազմակերպությունների ներկայացուցիչներ։

Ողջունելով ներկաներին՝ քահանա Շայդեն նշեց. «Ես սիրով եմ եկել այս երկիր, քանի որ Հայաստանն ինձ շատ է գրավում: Շնորհավորում եմ բոլորիս այս տոնի առիթով: Օրհնենք այս հիանալի օրը՝ հանուն հոր և որդու և սուրբ հոգու: «Գթության խոհանոց» ծրագրի 19-րդ շրջանը հայտարարում եմ բացված»:

Միանալով քահանայի խոսքին՝ Հայկական Կարմիր Խաչի նախագահ Մ. Մնացականյանը մասնավորապես ասաց. ««Հուսո տունն» իր տեղը գտավ Գերմանական Կարմիր Խաչի շնորհիվ: Իմ երախտիքի խոսքն եմ հայտնում բոլոր նրանց, ովքեր 19 տարի ջանք ու եռանդ չեն խնայել այս նվիրական գործի համար: Շնորհակալ եմ նաև այս հիանալի միջոցառման կազմակերպիչներին»:

Ելույթի վերջում Մ. Մնացականյանը Հայկական Կարմիր Խաչի պատվավոր անդամի շքանշան շնորհեց ԱՌՆԱՊ-ի տնօրեն Մ. Պողոսյանին:

Ներկաներին շնորհավորեց նաև ՀՀ ԱԻՆ ՓԾ տնօրենի տեղակալ Ն. Գրիգորյանը. «ԱԻ նախարար Արմեն Երիցյանի անունից շնորհավորում եմ բոլորիդ այս հիասքանչ օրվա առիթով: Սա մարդասիրության և բարեհոգության վառ օրինակ է մեր երկրում: Բոլոր տեսակի աղետների դեմ պայքարի հիմքում դրված են նախ և առաջ գթասրտությունն ու բարությունը: Նման ծրագրերը շատ մեծ հենարան են Հայաստանի և հայ ազգի համար: Համոզված եմ՝ կգա մի օր, երբ մենք՝ կամավորներով, «Հուսո տներ» կբացենք նաև այլ երկրներում»:

Պարային ու երաժշտական համարներով ուղեկցվող միջոցառումն ավարտվեց ճաշկերույթով, որին մասնակցում էին «Գթության խոհանոց» ծրագրի բացման արարողության հյուրերն ու շահառուները։