Սիրիահայերի հիմնախնդիրները՝ համահայկական կառույցների ուշադրության կենտրոնում

Հոկտեմբերի 31-ին ՀՀ սփյուռքի նախարար Հրանուշ Հակոբյանի մոտ համահայկական հոգևոր և աշխարհիկ կազմակերպությունների ներկայացուցիչների մասնակցությամբ կայացավ աշխատանքային խորհրդակցություն, որի նպատակն էր Հայաստանում գտնվող սիրիահայերի հիմնախնդիրների քննարկումը, կատարված աշխատանքի գնահատումը և առաջիկա անելիքների ճշգրտումը:

Սփյուռքի նախարար Հրանուշ Հակոբյանը շեշտեց, որ սիրիահայերի հիմնախնդիրները ՀՀ նախագահի ուշադրության կենտրոնում են, և արդեն ընդունվել են ինչպես ՀՀ կառավարության, այնպես էլ համապատասխան գերատեսչությունների մեկ տասնյակից ավելի որոշումներ, կատարվել են օրենսդրական փոփոխություններ:

ՀՀ սփյուռքի նախարարության աշխատակազմի ղեկավար Ֆիրդուս Զաքարյանն իր զեկույցում նշեց, որ առաջնային բուժսպասարկման ոլորտում սիրիահայերը հնարավորություն ունեն անվճար բուժօգնության, դյուրացվել է անձնագրերի և երկիր մուտք գործելու արտոնագրերի տրամադրման գործընթացը, զրոյացված են ժամկետանց փաստաթղթերի համար սահմանված տույժերը, մեքենաների ժամանակավոր ներմուծման դեպքում չեն գանձվում սահմանված մաքսային վճարները: Նա նշեց նաև, որ Երևանում գործում է սիրիական կրթական ծրագրով դպրոց (270 աշակերտ), ուր դասավանդում են սիրիահայ ուսուցիչներ: Սիրիահայերը հիմնել են «Սիրիահայերի հիմնախնդիրները համակարգող կենտրոն» հասարակական կազմակերպությունը, որը զբաղվում է Հայաստանում գտնվող սիրիահայերի խնդիրների համակարգմամբ և նյութական աջակցության կազմակերպմամբ:

Սիրիահայերի հիմնախնդիրների լուծման նպատակով գումարվել է միջգերատեսչական հանձնաժողովի նիստ, ձևակերպվել են առաջնահերթ հիմնախնդիրները և ներկայացվել ՀՀ վարչապետին:

Ըստ զեկուցողների՝ նշանակալի աշխատանք է կատարել Հայկական բարեգործական ընդհանուր միությունը, որը պատրաստակամություն է հայտնել աջակցել սիրիահայ ուսանողների ուսման վարձի, մարզերում բնակություն հաստատել ցանկացողների բնակարանի վարձի վճարման հարցում: ՀԲԸՄ-ի տրամադրած գրասենյակային տարածքում է գործում «Սիրիահայերի հիմնախնդիրները համակարգող կենտրոն» հասարակական կազմակերպությունը:

Համազգային հայ կրթական և մշակութային միության ներկայացուցիչ Լիլիթ Գալստյանը ներկայացրեց ՀՅԴ-ի «Օգնիր եղբորդ» նախաձեռնությունը՝ սիրիահայերին պարենով աջակցելու, շուրջ 60 տոննա սննդամթերք հավաքագրելու գործընթացը:

ՀՕՄ ներկայացուցիչ Նարինե Գալստյանը տեղեկացրեց, որ ամենշաբաթյա «Արամ Մանուկյան» կենտրոնում կազմակերպվող հանդիպումների արդյունքում ճշգրտվում են սիրիահայերի հիմնական պահանջները: Կազմակերպությունն արդեն շուրջ 220 սիրիահայի հագուստ և կոշիկ, 160 ընտանիքի պարենամթերք է տրամադրվել, առաջիկայում կբաժանվեն նաև ծածկոցներ:

«Հայաստան» համահայկական հիմնադրամի տնօրենի խորհրդական Աիդա Խաչիկյանը տեղեկացրեց, որ հիմնադրամի ծրագրերը վերանայվել են, ինչի արդյունքում նոյեմբերին հավաքվելիք գումարի 10 տոկոսը հատկացվելու է Հայաստանում ապրող սիրիահայերի հիմնախնդիրների լուծման նպատակով:

Զեկուցողներն իրենց խոսքում նշեցին, որ ծրագրեր են իրականացվում սիրիահայ երիտասարդների հայաստանյան առօրյան կազմակերպելու ուղղությամբ, «Հայկական Կարիտասի» կողմից ծրագրեր են մշակվել և ներկայացվել Գերմանական կողմին՝ առավել կարիքավոր ընտանիքներին շուրջ 150 եվրո ամենամսյա օգնություն տրամադրելու նպատակով, իսկ «Հովարդ Կարագյոզյան» բժշկական բարեգործական ՀԿ-ն շուրջ 50.000 դոլար հավելյալ ֆինանսավորում է հատկացվել սիրիահայերի առողջապահական խնդիրների համար: Հատուկ հրահանգով սիրիահայերի 1-14 տարեկան երեխաները սպասարկվում են արտահերթ և անվճար: Աշխատանք է տարվում սիրիահայերի հետ՝ աջակցելով նրանց աշխատանքի տեղավորման հարցում:

Սիրիահայերի հիմնախնդիրների լուծման ուղղությամբ նշանակալի գործունեություն են ծավալել նաև «Տաշիր» հիմնադրամը, Ռուսաստանի հայերի միությունը, Համաշխարհային հայկական կոնգրեսը:

ՀՀ սփյուռքի նախարարը ներկաների ուշադրությունը հրավիրեց առանցքային այնպիսի հիմնահարցերի վրա, ինչպես Հայաստանում գտնվող սիրիահայերի աշխատանքի տեղավորման, բնակարանով ապահովման հարցերն են: Նախարարը նշեց նաև, որ սիրիահայերի բարձրացրած ընդհանրական բոլոր խնդիրները ստացել են համապատասխան լուծումներ, սակայն ժամանակի ընթացքում առաջանում են նորանոր խնդիրներ, որոնք նույնպես անհապաղ ուշադրություն են պահանջում: Նախարարը կարևորեց նաև սիրիահայերին Հայաստանում սեփական գործ հիմնելու հնարավորության ընձեռումը, ինչը կնպաստի նաև աշխատատեղերի ավելացմանը:

Խորհրդակցության ավարտին ներկաները պատրաստակամություն հայտնեցին համագործակցել առավել համակարգված՝ նախանշելով հիմնական ուղղություններն ու առաջնահերթությունները: