Անդրադարձ է եղել սիրիահայերի բնակարանային և աշխատանքային խնդիրներին

ՀՀ փոխվարչապետ, տարածքային կառավարման նախարար Արմեն Գևորգյանի մոտ մարզպետների մասնակցությամբ այսօր կայացած խորհրդակցության ընթացքում ՀՀ սփյուռքի նախարար Հրանուշ Հակոբյանն անդրադարձել է սիրիահայերի բնակարանային ապահովության խնդրին: Նախարարը մարզպետներին առաջարկել է տեղեկություններ ներկայացնել մայրաքաղաքին մոտ գտնվող համայնքներում վարձակալության հիմունքներով տրվող բնակարանների առկայության, ինչպես նաև համայնքներում թափուր աշխատատեղերի վերաբերյալ:

Փոխվարչապետը մարզպետներին հանձնարարել է մեկշաբաթյա ժամկետում Սփյուռքի նախարարություն ներկայացնել պահանջվող տեղեկությունները, ինչպես նաև հաշվի առնելով սիրիահայերի մասնագիտական հմտությունները՝ քննարկել տեղերում աշխատանքով ապահովելու հնարավորությունները:

Խորհրդակցությանը ՀՀ գյուղատնտեսության նախարար Սերգո Կարապետյանը ներկայացրել է մարզերում հողօգտագործողներին մատչելի գնով պարարտանյութ և դիզելային վառելանյութ տրամադրելու պետական ծրագրերի ընթացքը: Նշվել է, որ պարարտանյութի բաշխման աշխատանքները մոտենում են ավարտին, ընթացքի մեջ է դիզվառելանյութի բաշխումը: Անդրադարձ է եղել նաև առաջին վերարտադրության սերմացուի դիմաց գյուղացիական տնտեսությունների կողմից պարտավորությունների կատարման ընթացքին ու ցուցանիշներին: Փոխվարչապետը մարզպետներին հանձնարարել է աջակցել Գյուղատնտեսության նախարարությունը ծրագրերի իրականացման հարցում:

Քննարկվել են նաև մթերման գործընթացին վերաբերող հարցեր: Փոխվարչապետը նշել է, որ մթերող կազմակերպությունների կողմից վճարումների ուշացման խնդիրն այսօր համայնքապետերը բարձրացրել են Արմավիրի մարզ կատարած այցի ժամանակ, և կարևորել բերքի դիմաց վճարումների կատարումը:

Անդրադարձ է եղել նաև համայնքային բյուջեների վրա 2013 թ. հունվարի 1-ից «Եկամտային հարկի մասին» ՀՀ օրենքի կիրարկման և նվազագույն աշխատավարձի դրույքաչափի փոփոխության ազդեցությանը: Ա.Գևորգյանը մարզպետներին հանձնարարել է աշխատել համայնքապետերի հետ, որպեսզի կատարված օրենսդրական փոփոխությունները հաշվի առնելով' համապատասխան հաշվարկներ կատարվեն և նախատեսվեն վճարման աղբյուրները: