Կոնյակ վարչապետից, բայց միայն տակից

Այսօր առավոտից ԱԺ Պետաիրավական հանձնաժողովի նախագահ Դավիթ Հարությունյանին հուզում էր մի հարց՝ ներկայացուցչական ծախսերը: Հայտնի է, որ Հարությունյանն ամենաշրջագայող պատգամավորն է, ուստի ո՞վ, եթե ոչ նա, լավ գիտե, թե ի՞նչ արժե ուղևորությունը, ի՞նչ է դա նստում բարձրաստիճան պաշտոնյայի վրա՝ ինչ պաշտոն էլ որ զբաղեցնի, և ի՞նչ նպատակով էլ գնա որևէ երկիր, այնուամենայնիվ, հայ է և, որպես պատվախնդիր հայ, ի սկզբանե ինքն իրեն դնում է պատասխանատվության տակ ու հային վայել ուղևորվում՝ կոնյակ, բաստուրմա, սուջուխ, նվերներ:

- Պարո՛ն Թովմասյան, ըհը՛, խնդրում եմ՝ ասեք՝ դուք ներկայացուցչական ծախսեր չունե՞ք, այն, ինչ տալիս են, ձեզ, ո՞նց եք անում,- Հրայր Թովմասյանն էր զեկուցողը՝ ավելի քան հարմար մեկը նման ծախսերի գինն իմանալու,- ասեցիք Էստոնիա էիք գնացել, նախարարը հո ձեռնունայն չի՞ գնում: Ձեր գրպանից եք չէ՞ դնում:

- Դեեե՜, գիտեք ոնց..., վարչապետի հետ ենք համաձայնեցնում, չգիտեմ որտեղից ա,- քաշվելով փորձեց ինչ-որ ձևով տակից դուրս գալ արդարադատության նախարարը, երբ օգնության շտապեց ֆինանսների փոխնախարար Պավել Սաֆարյանն ու «ձևը» բացատրեց:

- Ամեն կառույցի տրվում է 1,5 մլն դրամ՝ այսպես կոչված ներկայացուցչական ծախսերի համար՝ դե, որ մի բան են կազմակերպում՝ սուրճ է, ջուր է, էդ կարգի: Իսկ երբ դրսից մարդիկ են գալիս, պատվիրակություններ է, ինչ է, նրանց կեցության և այլ ծախսերն արդեն կառավարության ներկայացուցչական ծախսերից է տրվում՝ էլի վարչապետի որոշմամբ: Իսկ երբ նախարարն է մի տեղ գնում ու մի բան պիտի արվի, դրա համար էլ ձև կա, էլի վարչապետն է որոշում ընդունում: Սա ա այսօրվա կարգավորման դաշտը,- պարզաբանեց ֆինանսների փոխնախարարը:

Ինչպես տեսնում ենք, ցանկացած պետություն կնախանձեր ՀՀ կառավարության կարգավորվածությանը։ Փաստորեն, մեր երկրում վարչապետը ոչ միայն իր ենթակաների բուն աշխատանքային, այլև «սուջուխ-բաստուրմայական» գործունեությունից է տեղյակ:

Լուսինե Կեսոյան