Սիբիրախտ հանուն մոնոպոլիայի. այո՞, թե՞ ոչ

Երեկ գործընկեր-մարզպետների հետ խորհրդարան էր եկել նաև Գեղարքունիքի մարզպետ Ռաֆիկ Գրիգորյանը: Նրան տեսնելով՝ լրագրողները սկսեցին հարցեր տալ սիբիրախտից, մարզպետն էլ սկսեց պաշտոնական բացատրությունները: Հայտնեց, թե էսպես ու էսպես, սիբիրախտով տուժածներին էսինչ բաներն ենք արել, ամեն ինչ «օկ է» ու թե մի քանի վարկածներ կան, թե ինչի հանկարծ ու սիբիրախտ բռնկվեց, որ ինչ-որ բան են քանդել, որի տակ ոսկորներ են եղել, դրանից էլ վարակվել են: Օգտվելով առիթից.

- Պարո՛ն Գրիգորյան, թույլ կտա՞ք մի վարկած էլ ես առաջ քաշեմ: Խոսակցություններ կան, որ դա արհեստականորեն ստեղծված մի բան է, որի նպատակը մոնոպոլիայի հաստատումն է, որպեսզի արհեստականորեն խուճապ ստեղծվի, ժողովրդի աչքը վախեցնեն և այլևս օրախնդիր դառնա հանրապետությունում մեկ սպանդանոց ունենալը, որից հետո այլևս գյուղացիներն անգամ իրենց անասուններն իրենց բակում չեն համարձակվի մորթել, այլ ստիպված լինեն տանել այսինչին պատկանող սպանդանոց, որտեղ և իբր կվերահսկվի այդ ամենը:

- Ես խորհուրդ կտամ գոնե էս խնդրի վերաբերյալ գոնե նման վերլուծություններ մի՛ արեք: Դուք տեսնում եք, որ իրականում սա շատ ծանր հիվանդություն է և սիբիրախտը բոլորդ շատ լավ պատկերացնում եք: Խնդրում եմ էդ մասով ավելի զուսպ եղեք, նման բան չկա: Եթե մարդկանց՝ 37 մարդու մոտ արտաքին էդ նախանշանները կան, ինչի՞ մասին է խոսքը:

- Իսկ Դուք բացառում ե՞ք, որ դա կարող էր դիտավորյալ կազմակերպված լինել: Չէ՞ որ պատերազմներ սանձազերծելու համար ինչի ասես չեն դիմում, կարող են աղետ առաջացնել, կոնֆլիկտ հրահրել, իսկ այս դեպքում նման մոնոպոլիա հաստատելու համար կարող էին չէ՞ որոշ շահագրգիռ ուժեր մի երկու անասուն վարակել և…

- Դիվերսիան բացառում եմ: Ո՛չ, ինչի՞ համար:

- Լա՛վ, պարո՛ն Գրիգորյան, մի վրդովվեք: Կասե՞ք, Ձեզ ո՞նց եք զգում որպես մարզպետ:

- Շատ լավ:

- Դե, եկել եք խորհրդարան. սա Ձեզ հարազատ կառույց է, այստեղ էի՞ք Ձեզ լավ զգում, թե՞ հիմա՝ գործադիր ոլորտում: Կարոտել ե՞ք:

- 10 տարի որ մի տեղ լինել, իհարկե, կարոտը կա:

- Բայց որտե՞ղ է Ձեզ համար ավելի լավ:

- Ի՞նչ է նշանակում ավելի լավ: Որտեղ որոշում կայացվի, էնտեղ:

- Այսի՞նքն, ինչպե՞ս թե որտեղ որոշում կայացվի: Ինչ է՞՝ Ռաֆիկ Գրիգորյան մարդը մնացել է մի կո՞ղմ:

- Գալիս եմ էստեղ՝ էստեղ եմ լավ զգում, գնում եմ մարզ, մարզում եմ լավ զգում:

Լուսինե Կեսոյան