Էրդողանը Թուրքիայի անդամակցության վերջնաժամկետ է սահմանել ԵՄ-ի համար

Թուրքիայի վարչապետ Ռեջեփ Թայիփ Էրդողանը ճնշում է գործադրում. գրում է գերմանական Der Spiegel պարբերականը: Մինչև 2023 թվականն իր երկիրը պետք է Եվրամիության կազմում լինի: Այսպիսով՝ Էրդողանը Թուրքիայի հանրապետության 100-ամյակի լրանալու կապակցությամբ ցանկանում է նման նվեր մատուցել իր երկրին: Սակայն միաժամանակ նա հույս է հայտնել, որ Բրյուսելը չի ստիպի Թուրքիային այդքան երկար սպասել. հայտարարել է վարչապետը Բեռլին կատարած իր այցելության ժամանակ:

Էրդողանը, Թուրքիայի՝ Եվրամիությանն անդամակցելու իր համար թույլատրելի ամենաուշ ժամկետը սահմանելով մինչև 2023թ.-ը, հայտարարել է. «Եթե դուք փորձեք մեզ դրանից ավելի երկար սպասեցնել, ապա Եվրամիությունը կկորցնի Թուրքիային»,-փոխանցում է թերթը:

Չորեքշաբթի երեկոյան՝ իր այցելության երկրորդ օրը, Էրդողանը հանդիպել է նաև Գերմանիայի կանցլեր Անգելա Մերկելին: Այս հանդիպման ընթացքում Թուրքիայի վարչապետը հիշեցրել է, որ մինչև 2023-ի իր երկրի 100-ամյա հոբելյանի ժամանակ Թուրքիան շատ ոլորտներում հիմնովին բարեփոխումներ կգրանցի, Գալիք սերունդերի համար թուրքական կառավարությունը պատրաստում է մի բոլորովին այլ Թուրքիա. ասել է Էրդողանը Անգելա Մերկելին: