Թուրքիայում «1915թ.-ի Հայոց ցեղասպանությունը» գիրքը հավակնում է դառնալ բեսթսելլեր

Թուրքիայում հանրահայտ լրագրող Հասան Ջեմալի «1915թ.-ի Հայոց ցեղասպանությունը» գիրքը մեծ քանակով վաճառվում է՝ հավակնելով դառնալ բեսթսելլեր: Այս մասին հայտնում է ИА REGNUM-ը՝ հղում կատարելով Zaman թերթի թղթակից Շահին Էլփային, հիշեցնելով, որ գիրքը լույս է տեսել միայն անցյալ ամիս: Աշխատանքը կոչվում է «1915թ.-ի Հայոց ցեղասպանությունը» և պատմում է Հայոց ցեղասպանության նկատմամբ հեղինակի դիրքորոշման փոփոխության մասին:

Հասան Ջեմալը Հայոց ցեղասպանությունն իրագործող առանցքային դեմքերից մեկի՝ Ջեմալ փաշայի թոռն է: Ջեմալ փաշան Կոնստանդնուպոլսում ռազմական դատարանի կողմից հեռակա կարգով դատապարտվել էր մահվան և 1922-ին՝ սպանվել:

Լրագրողի հաստափոր աշխատությունը սկսվում է դեռևս 30 տարի առաջ լրագրողի հրապարակած մի հոդվածով, որտեղ Հասան Ջեմալը պաշտպանում էր Հայոց ցեղասպանության հարցում Թուրքիայի կառավարության մերժողական քաղաքականությունը: Գրքի ողջ ընթացքում հեղինակը նկարագրում է իր դիրքորոշման էվոլյուցիան, որը սկսվում է Ցեղասպանության ժխտումից և եզրափակվում ԱՄՆ-ում Կալիֆորնիայի համալսարանում Հայոց Ցեղասպանության հրապարակավ ճանաչումով:

Zaman-ը գրում է, որ «1915թ.-ի Հայոց Ցեղասպանությունը» գրքի հեղինակը մինչ օրս որևէ հետապնդման չի ենթարկվել: «Դա խոսում է Թուրքիայում տարբեր տաբուների նկատմամբ ընթացող պայքարի լուրջ հաջողությունների մասին»,-գրում է Էլփայը: