«Հայաստանն առանց քաղբանտարկյալների». Բողոքի ակցիա Վերաքննիչ դատարանի դիմաց

Օրեր առաջ մի խումբ քաղաքացիների կողմից սկիզբ դրվեց «Հայաստանն առանց քաղբանտարկյալների» նախաձեռնությանը։ Նախաձեռնության անդամները միավորվել են ՀՀ Սահմանադրությամբ ամրագրված ինքնիշխան, ժողովրդավարական, սոցիալական, իրավական պետության գաղափարի, դրանից բխող՝ «Հայաստանն առանց քաղբանտարկյալների» տեսլականի շուրջ։ 

Այս ծրագրի համար հիմք է հանդիսացել նախորդ տարվա օգոստոսի 9-ին «Հայ ազգային կոնգրեսի» ակտիվիստների և ոստիկանության աշխատակիցների միջև տեղի ունեցած միջադեպից հետո մինչ օրս շարունակվող ՀԱԿ ակտիվիստների նկատմամբ քաղաքական հետապնդումը. այս տարվա հուլիսի 20-ին հրապարակված դատավճռով վերջիններս դատարապարտվեցին 2-6 տարվա ազատազրկման։

Լուրեր.com-ի հետ զրույցում  «Հայաստանն առանց քաղբանտարկյալների» նախաձեռնության անդամ Եվա Թովմասյանն ասաց, որ նոյեմբերի 2-ին՝ ժամը 13:00-ին, «Հայ ազգային կոնգրեսի» երիտասարդ ակտիվիստները բողոքի ցույց են անցկացնելու Վերաքննիչ դատարանի դիմաց, այն նույն ժամանակ, երբ ներսում ընթանալու է ՀԱԿ-ի չորս երիտասարդների գործով դատական նիստը:

«Օրը և վայրն իրենցից շատ մեծ խորհրդանիշ են ներկայացնում, թե ինչպես կարող է մի երկրի իշխանությունն իր երկրի չորս մեծ հեռանկարով երիտասարդների նկատմամբ խայտառակ, աչքի զարնող անօրինակամություններ իրականցնել: Հենց սրա համար էլ որոշվել է ակցիան Վերաքննիչի դիմաց իրականացնել»,- ասաց Թովմասյանը:

Նա նշեց, որ սա «Հայաստանն առանց քաղբանտարկյալների» նախաձեռնության առաջին հրապարակային ակցիան է: Հետագայում ևս կլինեն ակցիաներ տարբեր բնույթի, որոնք աստիճանաբար հայտնի կդառնան հանրությանը։ 

Անդրադառնալով այն հարցին, թե համագործակցություն այլ հ/կ-ների, կուսակցությունների երիտթևերի հետ լինելու է, թե՝ ոչ, Թովմասյանն ասաց. «Մենք բանակցել ենք մի շարք հասարակական կազմակերպությունների հետ և բավականին շատ համագործակցությունների համաձայնություններ ենք ստացել: Սա մեզ համար հաջողություն է»:

Թովմասյանի խոսքերով՝ այս հարցում ամենակարևորը միասնականությունն է։ Պետք է բոլորը, առանց քաղաքական հայացքներին նայելու, առանց նայելու` ով ինչ գաղափարախոսություն ունի, ով ինչ շահ է հետապնդում, ով ինչ ակնկալիքներ ունի, այդ ամենը մի կողմ դնելով՝ համախմբվեն Հայաստանում քաղաքական հետապնդումների դեմ պայքարին ու արմատախիլ անեն այդ երևույթը հայկական իրականության մեջից։

«Մեր բոլորի բարեկեցիկ ապագան կախված է մեր իրավունքներից: Եթե այսօր Հայաստանում կան քաղաքական հայացքների համար հետապնդվող անձինք, ապա յուրաքանչյուր ոք պարտավոր է մի կողմ դնել ամեն ինչ ու պայքարել նրանց ազատության համար: Եթե այսօր թույլ տանք, որ տղաներին բանտարկեն, եթե այսօր բոլորս միասին չպահանջենք, որ Տիգրանին ազատ արձակեն, ապա «բեսպրեդելի» մեջ թաթախված իշխանությունը վաղը կգա մեր ու ձեր ետևից, և այդ ժամանակ արդեն հնարավոր չի լինի կանգնեցնել ռեժիմի հանցագործությունների շարանը»,- ասաց Թովմասյանը:

 Գայանե Համբարձումյան