Արմեն Աշոտյանը ներկայացրեց նախարարության հարկային հաշվետվությունը

Կառավարության այսօր տեղի ունեցած հերթական նիստի ժամանակ այն նախարարություններից, որոնք պետք է ներկայացնեին հարկային հաշվետվությունները, առաջինն իր հաշվետվությունը ներկայացրեց ՀՀ կրթության և գիտության նախարար Արմեն Աշոտյանը:

Կրթության ոլորտի վերաբերյալ հաշվետվությունը ներկայացնում ենք ստորև.

Հայաստանի Հանրապետության կրթության ոլորտում գործում են 2343 ուսումնական հաստատություններ, որոնցից պետական-1514, համայնքային - 640, ոչ պետական – 170, այլ -19: Հիշյալ կազմակերպություններից լիցենզավորվել են 1486-ը կամ 63.4%-ը:

Կրթության մասնաբաժինը ՀՆԱ-ի արտադրությունում, ընթացիկ գներով, 2012 թվականի 1-ին կիսամյակի դրությամբ կազմում է 32,657 մլրդ դրամ նախորդ տարվա նույն ժամանակաշրջանի 30,289 մլրդ դրամի դիմաց: Կիսամյակի աճը արդեն կազմել է 7,8% :

Կրթության ոլորտի աշխատողների միջին թվաքանակը 2012 թվականի հունվար-օգոստոս ամիսների համար կազմել է 91004.3 մարդ 2011 թվաքանակի նույն ժամանակահատվածի 89550.7 –ի դիմաց: Աճը կազմել է 1453.6 մարդ կամ 1.6 %:

Պատկերն ըստ սեփականության ձևի հետևյալն է' պետական - 76380.7 մարդ նախորդ տարվա նույն ժամանակահատվածի 74849.9-ի դիմաց, համայնքային – 11779.8 նախորդ տարվա նույն ժամանակահատվածի 11210.0-ի դիմաց և ոչ պետական – 2843.8 նախորդ տարվա նույն ժամանակահատվածի 3490.8-ի դիմաց:

Աշխատողների միջին ամսական աշխատավարձը 2012 թվականի հունվար-օգոստոս ամիսների համար կազմել է 80884 դրամ նախորդ տարվա նույն ժամանակահատվածի 78483 դրամի դիմաց: Աճը կազմել է 2401 դրամ կամ 3.1%: Պատկերն ըստ սեփականության ձևերի հետևյալն է' պետական – 85282 դրամ նախարդ տարվա 82355-ի դիմաց, համայնքային - 48821 նախորդ տարվա 48306-ի դիմաց, ոչ պետական – 95579 նախորդ տարվա 92356-ի դիմաց:

Այսպիսով աշխատավարձի վճարմանն ուղղված միջոցների ծավալը 2012 թվականի 8 ամիսների համար կազմել է 58862.2 մլն դրամ նախորդ տարվա նույն ժամանակահատվածի 56225.5 մլն դրամի դիմաց: Աճը կազմել է 2660.7 մլն դրամ կամ 4,7%: Արդյունքում սոցիալական ապահովագրության վճարների գծով ՀՀ պետական բյուջե լրացուցիչ մուտքագրվել է հաշվարկային 480,6 մլն դրամ:

Կրթության բնագավառի վճարովի ծառայությունների ծավալը 2012 թվականի ութ ամսվա կտրվածքով 2011 թվականի համապատասխան ժամանակահատվածի նկատմամբ ընդհանուր առմամբ նվազել է, որը հիմնականում կապված է բուհերի վճարովի ուսուցման համակարգում ուսանողների թվի իջեցմամբ' պայմանավորված 2011-2012 ուսումնական տարում դպրոցների շրջանավարտների բացակայությամբ, իսկ եկամուտների հիմնական մասը ձևավորվում է բուհերում վճարովի ուսուցման գծով ստացվող եկամուտներից, սակայն արդեն 2012 թվականի օգոստոս ամսին արձանագրվել է վճարովի ծառայությունների ծավալի 4,6% աճ: Միայն պետական բուհերում 2012-2013 ուս. տարում վճարովի սովորողների թիվը կազմել է ավելի քան 12 հազար ուսանող, նախորդ ուսումնական տարվա շուրջ 6.5 հազարի դիմաց մինչև տարեվերջ ակնկալվում է մատուցվող վճարովի ծառայությունների զգալի աճ:

Բուհերից 12-ը համարվում են խոշոր հարկատուներ, հատկապես պարտադիր սոցիալական ապահովագրության վճարների գծով և գտնվում են ՀՀ-ի առաջին 100 հարկ վճարողների ցանկում: Եթե 2011 թվականին 1-ին կիսամյակում հիշյալ բուհերի կողմից պարտադիր սոց. ապահովագրության գծով վճարվել է 1709,0 մլն դրամ, 2012 թվականի 1-ին կիսամյակում վճարվել է 1965,4 մլն դրամ: Աճը կազմում է 15,0% /հիմք' taxinfo.am/:

2012 թվականի հոկտեմբեր 8-ի դրությամբ համակարգի գերավճարը կազմում է 3307,6 մլն դրամ, իսկ ապառքը ընդամենը' 11,3 մլն դրամ: Մասնավորապես բուհերի գերավճարը կազմում է 1696,4 մլն դրամ, 34,8 հազար դրամ ապառքի դիմաց:

Կրթության ոլորտում գործող կազմակերպություններից հիմնական հարկ վճարող կազմակերպությունների կողմից 2012 թվականի 1-ին կիսամյակում վճարվել է 4916.5 մլն դրամ 2011 թվականի նույն ժամանակահատվածի 4415.3 մլն դրամի դիմաց: Աճը կազմում է 501.2 մլն դրամ կամ 11.4%:

Ավագ դպրոցներից ընդամենը 35-ն են հարկվում ԱԱՀ-ով և 31-ը' շահութահարկով, որոնցից միայն 6-ի հաշվարկային գումարը գերազանցում է 100,0 հազ. դրամը: Արտադպրոցական կազմակերպություններից միայն երկուսն են շահութաբեր:

Նախարարությունը իր ենթակա կազմակերպությունների կողմից վճարվող հարկերի ծավալն ընդլայնելու նպատակով թույլտվություն է տվել թվով 57 ՊՈԱԿ-ներում ամրացված անշարժ գույքի վարձակալության տրամադրելու նպատակով:

Ոչ հարկային եկամուտների մասով 2012 թվականին տրվող լիցենզիաների համար գանձվող տարեկան պետական տուրքերի նախատեսված գումարը կազմում է 10455,0 հազ, դրամ, իսկ 2013 թվականին սպասվելիք եկամուտը կազմում է 37830,0 հազ դրամ: Աճը պայմանավորված է բարձրագույն մասնագիտական կրթական ծրագրի տրոհմամբ բակալավարի և մագիստրոսական ծրագրերի և 69 բակալավրի և 41 մագիստրոսի կրթական ծրագրերով լիցենզիաների տրամադրմամբ:

Կրթության ոլորտի տնտեսական աճի ներուժի և հարկման ենթակա եկամուտների ավելացման համար առաջիկա տարիներին նախատեսվում է'

• ընդլայնել ոլորտի կողմից մատուցվող վճարովի ծառայությունների ծավալը և որակը,

• կատարել բուհերի կանոնադրություններում համապատասխան փոփոխություններ' բուհերի ձեռնարկատիրական գործունեություն իրականացնելու հնարավորությունները մեծացնելու համար,

• մասնագիտական կրթության ոլորտի վճարովի համակարգում մեծացնել ընդգրկվածությունը,

• պահպանել պետության կարգավորող դերը, սահմանել ուսման վարձի վերին շեմ, խթանել ուսման վարձի գնագոյացման քաղաքականության ճկուն համակարգի ներդրմանը,

• ՀՀ բարձրագույն ուսումնական հաստատություններում ընդլայնել արտասահմանյան ուսանողների թիվը' զուգահեռաբար լուծելով բուհերի ժամանակակից պահանջներին համապատասխանող ենթակառուցվածքների /հանրակացարաններ և այլն/ հարցը,

• օրենսդրորեն խրախուսել և ստեղծել նպաստավոր պայմաններ, կրթության և գիտության բնագավառներում մասնավոր ներդրումներ իրականացնելու համար: