Ալիևը՝ աշխարհի ամենադաժան և կոռումպացված առաջնորդներից մեկը. Independent

Indepenent բրիտանական հեղինակավոր պարբերականի սևեռուն ուշադրությունն այս անգամ իր վրա են հրավիրել Ադրբեջանի նախագահ Իլհամ Ալիևի հետ Յորքի հերցոգ Էնդրյուի ունեցած կապերը: Ալիևը, որին «համարում են աշխարհի ամենադաժան և կոռումպացված առաջնորդներից մեկը», սերտ կապեր է ունեցել հերցոգ Էնդրյուի հետ. գրում է թերթը:

Ինչպես հաղորդում է Independent-ը, հերցոգ Էնդրյուն վերջին տարիներին հանդիսանում էր առևտրի և ներդրումների հարցերով Բրիտանիայի հատուկ ներկայացուցիչն արտասահմանում:

Սակայն «մասնավոր ինքնաթիռներ ձեռք բերելու նպատակով կատարված շռայլ ծախսերը, որոնք ֆինանսավորվում էին հարկատուների գրպանից, էլ չասած կասկածելի հեղինակությամբ և մանկապղծության մեջ մեղադրվող առաջնորդների հետ նրա ունեցած դատապարտելի ընկերական կապերը, ստիպել են հերցոգին հրաժարական տալ». գրում է թերթը:

«Դեպի Ադրբեջան կատարած նրա մի այցելության ծախսերը իրենց մեջ ներառում էին մասնավոր ինքնաթիռի վարձակալությունը, որը պետությանն արժեցել է 100 հազար դոլար»,-ասում է Independent-ը:

Հերցոգը պետք է արտասահմանում պաշտոնապես քարոզեր բրիտանական բիզնեսը: Սակայն գործնականում նրա գործունեությունը կառավարության համար ստեղծում էր միայն դժվարություններ և խառնաշփոթ. շարունակում է թերթը:

«Միայն վերջին 5 տարիների ընթացքում Էնդրյուն ութ անգամ այցելել է նախագահ Ալիևին: Համաձայն Բուկենհեմյան պալատի աղբյուրների՝ Ադրբեջանի և մարդու իրավունքները ոտնահարող այլ պետությունների հետ հերցոգի ունեցած բոլոր գործարքները վերջին տարիներին գնում էին բրիտանական կառավարության գծին համապատասխան»,-գրում է պարբերականը:

«Ադրբեջանական ԶԼՄ-ները վաղուց են շրջանառում լուրերն այն մասին, որ հերցոգն իր սեփական բիզնես-հետաքրքրություններն ունի տարածաշրջանում՝ ներառյալ Կասպից ծովի առափնյա շրջանում ունեցած գոլֆ-ակումբը: Սակայն Բուկենհեմյան պալատը ժխտում է նման շշուկները։

Մեզ մնում է միայն հույս հայտնել, որ արքայազն Էնդրյուն այդ «անձնական հանդիպումները» Բուկենհեմյան պալատում կօգտագործի, որպեսզի համոզի դեսպանին՝ արտահայտելու իր լուրջ անհանգստություններն Ադրբեջանում մարդու իրավունքների ոտնահարման բազմաթիվ դեպքերի հետ կապված»,-Independent-ին տված հարցազրույցում հայտնել է Amnesty International-ի ներկայացուցիչ Նատալյա Նովաձեն: