ՕԵԿ-ի «մուտիլովկեքն» ու սյուրռեալիզմը

Հայաստանյան կուսակցությունները մի բանով գոնե հաստատ նման են երեխաների. երկուսն էլ շատ են սիրում կարկանդակ ու երկուսն էլ ահավոր չեն սիրում, երբ իրենց փորձում են կարկանդակից զրկել: 2008թ. նախագահական ընտրություններից հետո ՕԵԿ-ը՝ առաջնորդ Արթուր Բաղդասարյանի «հմուտ քաղաքականության» շնորհիվ միանգամից մի քանի «կարկանդակի» տեր դարձավ: Մեկուկես տարի առաջ ՕԵԿ-ին բաժին հասած «կարկանդակներից» մեկից ՀՀԿ-ն մի թեթև «կսմթեց». նախկինում գյուղատնտեսության նախարարության ենթակայության տակ գործող Սննդի անվտանգության տեսչությունը վերակազմավորվեց և անցավ ուղղակիորեն կառավարության վերահսկողության տակ: Բնական է, որ դրանից հետո գյուղնախարարության փողերը տնօրինող ՕԵԿ-ը զրկվեց Սննդի անվտանգության ծառայության նման եկամտաբեր կառույցի մուտքերի ու ելքերի «նայողի» լիազորությունից և...

Եվ պարզվում է՝ ժամանակը վերքերը բոլորովին էլ չի բուժում, հակառակը... Կորուստը ՕԵԿ-ը շա՜տ ծանր է տանում և ոչ մի կերպ չի ցանկանում հաշտվել դրա հետ: Եվ ահա թե ինչպիսի՜ գերհզոր արգումենտ են երկնել օրինացերկրականները՝ կարկանդակն էլի իրենցով անելու համար: ՕԵԿ պատգամավոր Հովհաննես Մարգարյանը, օգտվելով պետբյուջեի քննարկումների ժամանակ հավաքված բարձրակարգ լսարանի առաջ լսելի դառնալու հնարավորությունից, հանդես եկավ բացատրական ճառով՝ ներկայացնելով այն բոլոր վնասներն ու արհավիրքները, որ կրում է Հայաստանի Հանրապետությունն ու հայ ժողովուրդը միայն այն պատճառով, որ Սննդի անվտանգության ծառայությունը հանել են գյուղնախարարության կազմից:

- Էդ ո՞նց եղավ, որ մարդիկ սկսեցին սիբիրախտ վարակվել: 2003-04թթ. ամբողջ Շիրակի մարզում էլի սիբիրախտ էր, բայց ոչ մի մարդ էդպես էլ չվարակվեց: Էն ժամանակ սննդի անվտանգության տեսչությունը գյուղնախարարության կազմում էր: Հիմա, հենց դուրս բերեցիք նախարարությունից ու անհասկանալի է, թե ո՞վ է վերահսկում էդ ծառայությունը, Գեղարքունիքում սկսեցին վարակվել սիբիրախտով: Չեք կարծո՞ւմ, որ հարկավոր է նորից վերադարձնել գյուղատնտեսության նախարարության կազմ:

Թե ո՞վ էր նման սյուրռեալիստական միտք ներշնչել Մարգարյան Հովիկին՝ անձամբ մեծն Արթուր Բաղդասարյա՞նը, թե՞ նա ընդամենը Սերգո Կարապետյանի մուրազն էր փոխանցում, դժվար է ասել: Ամեն դեպքում, կարկանդակի կտորի համար մղվող ճակատամարտի այս փուլում հանրապետականները «կուտը չկերան» և ՕԵԿ-ի համար մի փոքր լիկբեզ կազմակերպեցին՝ թե ինչ ասել է սիբիրախտ և մարդիկ ինչու են վարակվում կամ չեն վարակվում, և որ վարակվելն ընդհանրապես կապ չունի նրա հետ, թե ով է կառույցում պտտվող փողերն «իրենով անում»: